Online Reporter
Ugwalo: Emfuleni Wezinyembezi olwalotshwa ngu- Ezekiel S K Hleza
Ophezulu Stinta
SIQHUBEKA ngogwalo lwethu lapho esitshiye khona amadoda eganga esetshaya impi etshisayo, amajaha eganga lawa kucaca kawabuyeli emuva, azimisele ukutshaya uhlamvu umhlaba ubuyele kubanini.
Kusahluko setshumi lantathu sekulungiselwa indawo yempi lapha amadoda asegebhe khona imigelo yokuzivikela, kwathi lalabo abaqeqetshe kwezokukhangela imitshina labo sebehlezi ngendawo zabo bevule amehlo.
IMapate yonke yavalwa, impi kaMgandane yayilazo inhloli ezazingene zathi tshwathi phakathi kwamabhunu zacupha udaba lonke lunjengoba lunjalo zeza lodaba ekhaya. Lokhu-ke kwenza ekaMgandane yahloma yaphelela.
Siyafunda lapha ukuthi kungelinye ikhono lokubamba impi ukuba lenhloli ezikhaliphileyo ezikwazi ukuyakuma phakathi kwesitha zingabanjwa ziphume lomnkantsho wodaba lunjengoba lunjalo.
Kuqakathekile kakhulu ukuthi inhloli kube yilezo eziqeqetshileyo ngoba ukubanjwa kwazo kutsho ukuchitheka kwenkamba lukuchitheka kwegazi.
Sekugonjolozelwe iMapate yonke izakhamizi zahle zaqoqonselwa ukuthi zisuke emizini ziye kude ukuze zingalinyazwa zinhlamvu.
Ngalokhu-ke siyaqakezela inkamba kaMgandane ngokunakekela umphakathi, babengafisi ukuthi izakhamizi zichithekelwe ligazi kungela sizatho loba nje labo bengabantu ababekhangelele ukuthi bathathe umhlaba wabo.
Kuyisifundo esikhulu ukuthi loba ingqondo ingabe isigcwele amandla empi akumelanga kuphele uzwelo kwabangelamandla.
Lathi nje liphuma ilanga lahle laphuma ngokukhala kwemibhobho eyesabekayo indlela yeGwanda kusiya eGungwe, iMapate yonke kwasekuthunqa intuthu, abafana babevitshe imigwaqo yonke bathula bathi zwi.
AmaBhunu adibana lembila zithutha, kwakhala imibhobho yohlobo olukhulu imitshina engomaquphula, kwaba mnyama ilanga lisenkanda. Ngesikhatshana nje abafana basebezigenqulile ezamaBhunu.
Abafana basebedatshukelwe zimpahla, besopha igazi belinyazwe zinhlamvu zesitha, kodwa abazange babeke phansi izikhali, kwakumele injongo emqoka ifezwe. Abazange badele, yikho lapha esibona khona isibindi esimangalisayo sabafana beganga, lapho kukhulunywa ngesotsha kukhangelwa isibindi esifana labafana bakaMgandane.
Sinanzelela ukuthi lo akusimsebenzi ongahawukelwa ngabantukazana nje kodwa ngabantu abalombono bengakhangelelanga mbadalo evela emuntwini.
