Online Reporter
Ugwalo: Emfuleni Wezinyembezi olwalotshwa ngu- Ezekiel S K Hleza, Ophezulu Stinta
Siqhubeka logwalo lwethu lubanga emaphethelweni. Ngeviki edlulileyo sitshiye iMapate isibuyela ekuthuleni kancane kancane lapho sibona amajaha eseqala nje ukuhamba ngababili ngababili kusobala ukuthi umumo wawususiba ngcono.
Izakhamizi lazo sezibuyele emizini yazo. Umbhobho lawo wawusuzwakala gqo nje lezimota zamabhunu zingasabonakali endleleni, kwakuyisifiso somuntu wonke ukuthi kube khona lokhu kuthula emhlabeni.
UMgandane laye aze abuze kuZibunuzamabhunu ukuthi kambe ukhona owayecabanga ukuthi babengahlala ndawonye kuthe cwaka kungela bhunu elizula zulayo. Liphupho ayelibona lifezeka laye uZibunu zamabhunu ukuthi ngempela amabhunu ayesedutshuliwe aphela du sekusobala ukuthi umhlaba wawusuzathathwa ngabantu abansundu.
Isiqiniseko sase sisobala ukuthi ilizwe laselithethwe ngabansundu, igazi lonke leliyana elageleza ngemifula, imiphefumulo eyatshabalala itshiswa ihangulwa ngemililo idutshulwa ngemibhobho kambe yayingasithola isibongo na.
UZibunuzamabhunu ongunozindaba wayelazo zonke indaba lezi, nangu esebika ukuthi eMozambique basebebulele abantwana babantu abansundu, abantu abangelacala abantu abangela zikhali.
UMgandane kazange ethuswe ludaba lolu kodwa wakubona nje ngelihlo lenhlakanipho yempi ukuthi kwakungamagwala lawa ehluleka ukuthi abaqonde manqamu kodwa egegelela abantu abamsulwa abangazi lokuthi isikhali sibanjwa njani.
Lokhu ke kuveza inhliziyo embi ngempela eyayithwelwe ngamabhunu, abantu ababebuswa luchuku enhlizweni kanye lengqondweni.
Kuzakhamizi lapha isitshwala sasingasangeni ngitsho, inhliziyo zazimnyama ngenxa yombiko wokubulawa kwabantwana le kwele Mozambique.
Iganga le Mapate kwakuliganga elalingahambeki nje lula laligcwele amathambo abantu, esemhlophe nke kanye lalawo awezifuyo zabo.
Kwakusuka kuvuke umhelo osikayo kozeleyo lapho becabanga kamhlophe nje ukuthi ngamathambo enzalo yawo, abantwana babo kanye lezihlobo zegazi, yibuhlungu obabungasuki enhlizweni zabo lemoyeni.
UMaMoyo ngomunye walabo abafelwayo babulawelwa, wazama ke ukucela ebafaneni beganga ukuthi ayengcwaba umntanakhe uSidingani kanye lomkakhe ukuze nje laye adelise inhliziyo yakhe lethumbu elalala leso sidumbu.
Abafana beganga bala kwaphela ngelithi babengasoze bavumele isicelo esinjalo ngomuntu owakhetha ukuthengisa umhlaba.
