Online Reporter
Nkosilathi Sibanda
IBULAWAYO Corporate Social Soccer League (BCSSL) ingena kumidlalo yetshumi lane kulimpelaviki nanko ukuncintisana phezulu kwelogu sekutshisa njengoba iSimbisa FC iqhubeka ngokukhokhela, kuthi amaqembu ayilandelayo azama ukuvala umehluko wemincintiswano.
ISimbisa isaqhubeka ihlezi esiqongweni ngemva kokwenza kuhle emidlalweni engu-13. Iqembu leli selinqobe imidlalo engu-11, ladlala ngokulingana owodwa njalo lanqotshwa kanye kuphela.
Seliqoqe imiklomelo engu-34 njalo imvimbi zayo ziqine kulazo zonke kuligi njengoba selihlohlwe amabhola ayisitshiya galombili kuphela.
Umehluko wamabhola angu-30 utshengisa sobala ukuthi yilo elibusayo kule isizini.
Kuliviki, iSimbisa izahlangana leZETDC emdlalweni ozadlalelwa eSotshangane. Lanxa iZETDC ihlezi kunombolo yesi-13 ngemiklomelo engu-13, izabe izimisele ukudala umehluko ngokunqoba abakhokheli beligi.
I-Overnight Express ehlezi kunombolo yesibili leValue Gas ekunombolo yesithathu. Zombili ziphethe imiklomelo elinganayo (28). I-Overnight Express ilomdlalo owodwa esandleni okutsho ukuthi inganciphisa umehluko phakathi kwayo leSimbisa nxa ingaqhubeka inqoba.
Omunye wemidlalo okulindeleke ukuthi uthakazelelwe kakhulu yilo ozahlanganisa i-Overnight Express leZimtile eNketa 9. IZimtile ihlezi kunombolo yesihlanu ngemiklomelo engu-23 njalo ilethuba lokuba liqembu elingaphazamisa izifiso zamaqembu akhangelele ukuqeda isizini ephezulu.
IValue Gas yona izangena emdlalweni wayo leSpeed Shipping e-Ascot ikhangelwe njengentandokazi. Iqembu leli selifake amabhola angu-30 entanjeni, emidlalweni engu-12, okuyenza ibe ngelinye lamaqembu ahlasela kakhulu kuligi.
IHope FC ehlezi kunombolo yesine ngemiklomelo engu-25 izadibana leNUST eMagwegwe High School.
IHope isifake amabhola angu-35 emambuleni njalo iqhubeka iziveza njengelinye lamaqembu alakho ukuphazamisa impi yokunqoba iligi.
Kwelinye icele, iChibuku ehlezi kunombolo yesikhombisa izadlala leProton eNkulumane 12. IChibuku isiqoqe imiklomelo engu-21 emidlalweni engu-11 kuphela, okuyenza ibe phakathi kwamaqembu angadala isimanga ekupheleni kwesizini.
Ezansi kwetafula, iCoca-Cola esihlupheke kakhulu kulisizini izadinga ukubuyela endleleni yokunqoba lapho ezadibana khona leRydings Auto eMinyela. ICoca-Cola isinqobe kanye kuphela emidlalweni engu-11 njalo ilemiklomelo emithathu kuphela.
I-Ostrich FC izahlangana leLone Star eMbizo emdlalweni oqakathekileyo kulamaqembu womabili.
Kanti njalo iGrills FC leEvergold zizadibana eDairiboard emdlalweni lapho womabili amaqembu efuna imiklomelo epheleleyo ukuze aphume ebunzimeni bokuhlala emsileni wetafula.
