Online Reporter
Ugwalo: Umdumo wezinkondlo elalotshwa ngu NS Sigogo: Inkondlo: Izibongo zeqhawe eyalotshwa ngu NJ Tfwala
Ophezulu Stinta
Okumunyethweyo
Inkondlo le ibonga iqhawe ngomsebenzi omkhulu eliwenzayo. Iqhawe lapha enkondlweni liyahaywa, liyaphakanyiswa kuze kugiywe okwamagama, libongwa njalo ngendlela emangalisayo.
Umaziphosel’ ephukele!
Umjiken’ abawujik’ okwenduku,
Iqhawe ngumuntu ozimisela langempilo yakhe kambe nxa eziphosa aze ephukele lapho aphoselwe khona, uyephuka loba uyafa, kumbe aphile kodwa uzimisele ngempilo yakhe yonke ukuthi aphoselwe esizibeni zempi, ngoba iqhawe phela ngelinqoba impi ngelinqoba ukulwa.
Iqhawe leli ngempela liyayazi impi yalo, lokho akubizelweyo kakuthandabuzi ngitsho lakancane, umsebenzi wobuqhawe uyawuphelelisa.
Liyakwazi ukulwa litshiye kulucaca kungasali kuvuka ngitsho nje leyodwa indoda ezagijima iyobikela abanye ngobunzima obukhona. Asiboni ngitsho loyedwa ophakamayo ukulwisana kumbe lokumelana leqhawe leli, yinsizwa yomkhonto.
Ugadle wadla amadoda
Wawajuja amadoda
Okophondo lukabhejane.
Iqhawe kalilanembeza ngoba ngokwenze njalo, lingahawukela libuye njalo likhulule lesitha, esiyajika nje simphendukele. Kuthiwa lapho seligadla, selisilwa kalikhethi ukuthi lo ngowesintwana, lo ngumntwana. Kilo kuya sekufana, ngesaga esithi umntane nyoka yinyoka.
Udl’ ndlubu lamakhasi,
Umnumzana lenkosikazi, amadoda lezikhonzi.
Yizo na ke impawu zeqhawe qhawe ke lezi, eligadla likhangele celeni kungabi ndabazalutho. Imbongi iyalihaya leliqhawe ngesibindi esingaka ngoba lokhu kuthatha isibindi ukuthi indoda igadle kunye losana oluzelwe izolo.
Kuyisimanga esikhulu ukuthi phezu kwakho konke lokhu ukulwa lokuphoswa kwemikhonto, iqhawe leli lona lisala lingela nxeba ngitsho okusobala ukuthi ngempela liyakwazi ukuwuphosa umkhonto libuye njalo libekwazi lokuvimba, livitshe.
Usihlangu singumvalasangwana, onxeba liyimvela kancane.
Wadl’ umuntu lomfowabo, wadl’ ijaha losowabo.
Asiliboni iqhawe leli lilamanxeba, asizwa ngeqhawe leli lihlaselwa livalelwa kodwa lona yilo elibonakala lingenela amadoda, amavaka amagwala amakhulu abaleka aze azitshiye okusobala ukuthi kuyesabeka lokho ayabe ebhekane lakho, yikho nje bekhetha elithi nyawo ngibeletha. Imbongi ivezile zonke impawu zobuqhawe balindoda okokuthi ingancitshwa njani isicoco sobuqhawe ngemisebenzi engaka eyenzileyo.
