Online Reporter
Ethel Ncube
KUSIGA esihlasimulisa umzimba, kulomakorokoza weShurugwi ogwazwe ngengqamu wedlula emhlabeni ngeviki ephelileyo, kubangwa utshwala.
UPhilip Sithole okungasatholakalanga iminyaka yakhe kubikwa wagwazwa kabili ngemva kokuba lengxabano kubangwa utshwala, wathwalelwa esibhedlela seShurugwi lapho athi efika bathi usedlule emhlabeni.
Intatheli ixhumane lomunye owayekhona kuqalisa umsindo lo ezitolo, uMnumzana Alex Shumba, obike ukuba balusizi ngendaba le.
“USithole wayezinathela utshwala esezitolo, kwathutsha uNigel Ndomene baqala ukuthethisana omunye efuna ukunatha utshwala bomunye. USithole wazonda wadonsa uNdomene baphumela phandle kwesitolo baqala ukufuqana bacina sebesilwa.
“Khonokho uNdomene wakhupha i-okapi wagwaza uSithole kabili wahle wawela phansi. Baphanga badinga imota wathwalelwa esibhedlela.
“Ngokuswelakala kwenhlanhla bathi befika esibhedlela bathi kasekho,” kulandisa uShumba.
Umetheswacala wahle wavinjwa ngabantu, amapholisa enelisa ukumbopha.
Intatheli ixhumane lesikhulumi samapholisa eMidlands, u-Inspector Emmanuel Mahoko oveze ukuba indaba enjalo isezandleni zamapholisa.
“Umetheswacala, uNigel Ndomene, usezandleni zamapholisa, esolwa ngecala lokugwaza abulale uPhilip Sithole.
“Sixwayisa abantu ukuthi nxa bangaba lokungazwisisani kabadinge owesithathu ongabancedisa ukuxazulula inkinga kulokusebenzisa udlakela ngoba kucina kulahleka imphefumulo.
“Asiqakathekiseni impilo ngoba iligugu njalo iqakathekile kakhulu,” kuphetha uInsp Mahoko.
