Online Reporter
Zimpapers Sports Hub
ABADLALI benguqu kumaqembu akuligi ephakemeyo eyeCastle Lager Premiership babopha amajambo kuvulwa inkundla zomdlalo kulimpelaviki.
Isizungu ebesiphethe abathandi balumdlalo kasisekho kukanti lamaqembu asemelele ukuthi aphakulule ibhola elizathokozisa uzulu njengoba ethole isikhathi eside elolonga.
Inhlanganiso yePSL ikhiphe uluhlu lwemidlalo yalisizini ngoMvulo kuliviki. Umdlalo wakuqala udibanisa abafana abaqabuka iPSL, iScottland leTriangle, enkundleni yeRufaro ngoLwesihlanu.
I-Scottland ibe lamalungiselelo aphezulu kukhefu, phambili kokuthi ichinse inkundla lamaqembu abalelwa phezulu kunonobhutshuzwayo wakuleli.
Iqembu leli litshengisele ukuzimisela nanko liqhatshe uTonderai Ndiraya ukuthi abengumqeqetshi walo, qede lapho lathenga abadlali abagoqela uKhama Billiat, Tymon Machope, Lynoth Chikuhwa, Peter Muduhwa, Godfrey Makaruse kanye leSoccer Star of the Year uWalter Musona.
I-Triangle kulindeleke ukuthi layo idlale kuhle kumdlalo wokuvula isizini le loba nje ingazange izibike okuphezulu lokulungiselela.
Iqembu leHighlanders lizaqala ngohambo lokuya eBaobab Stadium ngeSonto ukuyadibana leMWOS ethethe indawo yeZPC Hwange. IMWOS, layo eqabuka inkundla zePSL, idabuka eNorton, budebuzane ledolobho leHarare njalo ifuna ukwenza izimanga.
Iqembu leDynamos elinqobe kunkezo yeCastle Challenge litshaya iSimba Bhora ngempelaviki edluleyo, ibuyela enkundleni yalo yokuzilolongela eRufaro Stadium lapho elizadibana khona leZPC Kariba.
ISimba Bhora izadlala leFC Platinum njalo kulindeleke ukuthi kube ngumdlalo ozahlabusa.
Elinye iqembu lakoBulawayo, iChicken Inn lamukela iBikita Mineral eLuveve ngoMgqibelo.
Umqeqetshi wamaGamecocks uJoey Antipas ulokholo lokuthi ithimu yabadlali alabo izalwela ukunqoba kuyo yonke imidlalo.
Ekhuluma leZimpapers Sports Hub uAntipas uthe umdlalo wabo leBikita Minerals awumethusi lakancane ngoba uwulungiselele wasuthiseka.
“Ngiyavuma ukuthi umdlalo wethu wokuqala sileBikita Minerals akusimdlalo omncinyane. Ithimu engiyibumbe lonyaka kumele inqobe kuyo yonke imidlalo. Iligi ilamathimu amanengi esidlala lawo, yikho ngisithi kusukela ngoMgqibelo kumele sinqobe,” nguAntipas lo.
NgoLwesibili iChicken Inn yethule abadlali abatsha unozinti owayekuArenel Movers u-Aaron “Arusha” Ngwenya, owayedlala kuChinhoyi Stars uKumbirai Nyamutenha, Tadiwa Muchenje owaye kuBulawayo Chiefs, Tinashe Mashaineri, Edward Musena (Kwekwe United), Walter Vuwa (Ngezi Platinum Stars) loVincent Mugande owasuka kuDRC United edlala kuligi kaDivision One kulumhlubulo welizwe.
