admin
Alisatshoni ilanga singezwanga ngezehlakalo ezitshwaqisa umzimba kwelakithi.
Abantu abaselakho ukuhloniphana phakathi kwabo ngitsho phakathi kwezihlobo abangane kumbe umuntu wonke nje jikelele.
Sesihlala sisizwa ngabafundisi abathathela abantu abafazi kumbe labo ababamba iganyavu ngenxa yokuthi abantu abaselayo imbeko, sebathatha bonke Ubuntu babo bayabutshwathika eguswini bakhohlwa ukuthi lo othethweyo ngowomkakhe kuphela kungakho ke ngeke waba ngowakho.
Sebebanengi abakhokheli bamabandla esizwa ngabo kuthiwa babonakala lezimomondiya besabalala idolobho lonke bekhohlwa nje ukuthi ngabantu abahloniphekayo ezigabeni.
Abanye abasazi ngitsho lokuthi akumelanga bahambe begijimisa amehlo yonke indawo nampo ofatha labo sebengabathathayo kumbe ukuqomisa.
Siloba nje kuviki ephelileyo elinye iphephandaba libike ukuba
kulendoda ethandana lomalukazana wayo.
Kubikwa ukuthi lindoda yeRusape ibize iye emacansini lomalukazana wayo, unkosikazi wendodana yayo.
Kambe sikuchasisa sithi kuyini okunje nxa umuntu ezathandana lomalukazana wakhe, umuntu okungamelanga asondelelane laye ngitsho lanxa behlala muzi munye.
Banengi njalo esizwa kuthiwa bathatha abantwababo babenze abafazi.
Angithi kuthiwa umntanakho ligazi lakho okutsho ukuthi useyingxenye yakho manje pho nxa abantu sebeyathatha amadodakazi bewabambe iganyavu kutshoni ke lokhu?
Akuselamuzi olomama ongakhaliyo ngedlalicatsha lomkakhe kumbe ukuthi ubaba akasahlali endlini.
Abantu labo abasahlonitshwa njalo abasanakekelwa.
Kungani konke lokhu kusenzakala?
Abantu sebakhohlwa njalo balahla amasiko sebengabantu abaphila sanyamazana kodwa isizatho salokhu ngeke sasithola ngoba nsuku zonke kuya kusiba lokunye okutsha okwenzakalayo okungasimangalisa.
Osokusele yikuthi abantu bafunde ukuthi umuntu owenza into elihlazo njengokubamba iganyavu ngeke wafa wahlonitshwa muntu esigabeni sakhe.
Abomthetho kumele babe lemithetho ezakwenza laba bantu bavalelwe entolongweni okweminyaka eminengi kumbe kuhle bahle bahanjiswe kogoqwanyawo ngoba hlezi bahlanyele umkhuhlane wabo wobungezwa.
Ngempela umuntu akuselamuntu, pho Ubuntu buzavela ngaphi?
Online Reporter