admin
Wayne Ncube
KULOMFANA oleminyaka yokuzalwa engu-17 omiswe phambi komthethwandaba weMasvingo esetheswa icala lokubamba ugogo oleminyaka engu-74 iganyavu.
Lesi sehlakalo kubikwa senzakala eMushagashe, ngaphansi kwenduna uChief Zimuto, mhlaka 26 Mpandula nyakenye lapho umsolwa azithela phezu kwesalukazi ngesikhathi sithinta izifuyo emadlelweni ngezikhathi zantambama.
Umtshutshisi wecala leli uMnumzana Liberty Hove, uchazele umthethwandaba ukuba, umfana lo walanda isalukazi wasikhulela, qede wasiphosela phansi ngaphambi kokuba asidlwenguile.
“Umsolwa wahlangana logogo elezifuyo zakhe emadlelweni ngezikhathi zehola lika 6 ntambama wasihlasela, wasiwisela phansi qede asibambe iganyavu.
Umfana lo uthe eqeda ukwenza ihlazo leli wahle wangena igusu wadliwa ngumswenya.
“Umsolwa wabanjwa ngamapholisa ngelanga elilandelayo ngemva kokuba isalukazi simangale emapholiseni,” ngumtshutshisi lo.
Umsolwa kazange achithe isikhathi somthethwandaba uhle walivuma icala lakhe lokudlwengula.
Umthethwandaba ugwebe umfana lo iminyaka eyisitshiyagalombili kwathi emibili yakhitshwa nxa kuyikuthi uzakube eziphethe kuhle entolongweni.
Online Reporter