Online Reporter
YiNtatheli kaMthunywa
AKUBIZWA ozwayo enkundleni yeBarbourfields Stadium koBulawayo lapho okukhangelelwe ukwethulwa ngokusemthethweni umgubho weNyanga yeZamasiko lamuhla.
Kukhangelelwe ukuthi kutshengiswe ilifa lelizwe lethu kanye lokwehlukana kwethu.
UMongameli welizwe uEmmerson Mnangagwa ukhangelelwe ukuthi avule ngokusemthethweni umkhosi welizwe lonke lo, ohlanganisa abantu, abakundima yokuzithokozisa kanye lamaqembu emigido yesintu ngaphansi kwesihloko esithi, “Ukutshiyana kwamasiko: Sithuthukisa Umbono ka-2030 (Cultural Diversity: Advancing Vision 2030.”
Kumgubho omkhulu lo kukhangelelwe ukuba kutshengiswe umculo, imigido yesintu, ezomceco, izinkondlo kanye lemisebenzi yesintu, kutshengisa ubuntu besiko leZimbabwe kanye lokubambana.
Ukukhethwa kwedolobho lakoBulawayo ukuthi kube yikho lapho okugujwa khona umkhosi wamasikolo kwamukelwe ngezandla zombili ngabasunguli kanye labathinteka kwezobuciko, nanko idolobho leli lichazwa njengesigodlo selizwe leZimbabwe kwezamasiko.
Umcimbi lo uzabuye unike abakundima yezokuzithokozisa abasakhulayo ithuba lokuthi baziveze elizweni lonke nxa besethula ubuciko babo kanye lokuthuthukisa ezokuvakatsha ngamasiko kanye lemisebenzi yezandla.
Umkhosi lo uhlelwe lugatsha lweZemidlalo, ezokuZithokozisa, ezobuciko lamaSiko ndawonye leNational Arts Council of Zimbabwe, ngenhloso yokukhuthaza abantu ukuthi bamukele njalo bavikele amasiko omdabu, indimi zesintu kanye lezimiso zesintu.
