Online Reporter
Inani labobhinya likhanya lisiya likhula elizweni lakithi okuyinto edanisayo ngoba engekho umuntu othanda ukuhlukuluzwa emacansini.
Akusela ukuthi ngumuntu omdala kumbe ngomutsha yizililo zodwa ngapha langapha.
Kambe nxa ijaha lizahudula isalukazi lisihlubule impahla akuhloli na lokhu? Batayi!
Uthole ugogo esetshudula ukuthi azikhulule kumzukulu wakhe amondlayo waze wakhula ukuze amhlukuluze kanje?
Ezinye ingane zikhula seziphila lemikhuhlane ethelelwana emacansini kanti zazizelwe zingelayo ngenxa yokuhlukuluzwa emacansini. Ezinye njalo zicina zisiyakwelatshwa imikhuhlane ethelelwana emacansini ngenxa yokuhlukuluzwa ngumuntu ezihlala laye. Kuyadanisa lokhu, kuyahlukuluza umphefumulo womuntu owazi ubuhlungu bokuzala.
Loba siluphatha mihla yonke udaba lwalezizigilamkhuba ezisemthethweni akusizo zonke indaba esizilobayo.
Ezinye sesizitshiya ngoba zingasoze zanele kuphephandaba likazulu. Amajele lemithethwandaba kuyanyakazela ngalababantu abangobhinya elizweni lakithi.
Okunye njalo esimele sibekwazi yikuba akusibo bonke obhinya ababanjwayo besiya miswa emthethwandaba abanye bafa bengajeziswanga.
Nxa umntwana ezabanjwa iganyavu nguyisemkhulu okweminyaka ekhula, uzakhula abe ngumuntu onjani kwelakusasa.
Abantu, ikakhulu abesifazane, sebephilela evalweni, khona ukutshiya usane lomuntu wesilisa sekusesabisa okwamagama.
Lokhu kwakungaziwa endulo, sasikubonela kumabhayisikopo simangala ukuthi kulabantu abangaphila njengenyamazana?
Lamuhla sekulilizwe lethu eseliphila angathi yibhayisikopo, yilo ilizwe lethu eselisenyanyeka kangaka.
Kuqakathekile ukuthi lezizigilamkhuba zazi ukuthi akuqili lazikhotha emhlane loba sekutheni.
Umuntu akumelanga esabe umthetho kuphela kodwa kumele agcine ubuntu bakhe.
Nxa umuntu ebhinya abantwabakhe abazalayo uyabe esesuke wangenwa yini?
Yebo, inengi labantu liyabe lisithi liyazelapha abanye njalo bayabe betshelwe ukuthi kuzenza babe lenhlanhla.
Kambe ngabe kuliqiniso, angithi ngabe banengi asebephumelele kodwa nanku baqhubeka bezidubekela. Yona inyanga leyo eyabe itshela abantu ukuthi bangazelapha kumbe bangathola inotho ngokwenza ububi bangaki abantu abaphenduka kuyo besithi sebesilile kumbe sebenothile?
Yebo singabantu njalo siyathanda ukuphila, kodwa kuqakathekile ukuthi siqale sizibuze ukuthi lokhu esikutshelwayo kungenzeka na?
Ngitsho lazo inyanga lezi ezixhwalileyo sezisenza ukuthi ezinye inyanga ezelaphayo sibili zingabe zisahlonitshwa kumele zilethwe phambi komthetho.
Ukukhalipha kwabantu bazimisele ukwenza okuhle kunye lokuhlonipha ngitsho losane kwenza abantu baphile impilo enhle.
