Online Reporter
Nkosilathi Sibanda
ISABELO sakoBulawayo sizananza ilanga lokukhankasela ukulondolozwa kwamaxhaphozi, iWorld Wetlands Day ngoLwesibili.
Lokhu kuvezwe lugatsha lwe-Environmental Management Agency (Ema).
Ilanga lokunanza ukulondolozwa kwamaxhaphozi umhlaba wonke ngumhlaka 2Nhlolanja. Ngokunjalo, isabelo sakoBulawayo silandela okwenziwa umhlaba wonke ngokuthakazelela lelilanga.
Kumbiko wayo, ugatsha lwe-Environmental Management Agency luthe koBulawayo abantu bazakuthi gwaqa esikolo seHenry Low mhlaka 17 Nhlolanja.
Indikimba yalonyaka ngethi: “Amaxhaphozi lolwazi lomdabuko: Ukuthakazelela ilifa lesiNtu.”
Ugatsha lwe-EMA koBulawayo luthe:
“Indikimba yalonyaka igcizelela ukubaluleka kolwazi, inkolo lemikhuba esetshenziswa ngumphakathi kusukela kudala ekuvikeleni lokuphatheni amaxhaphozi amanzi ngendlela efaneleyo.
“Yingakho, isabelo sizananza ukulondolozwa kwamaxhaphozi mhlaka 17 February 2026 esikolo seHenry Low Primary njalo lumkhosi uqala ngehola lesitshiya galolunye ekuseni.”
