derick.khumalo
Sikhumbuzo Moyo
UMSEKELI kaMongameli, u-Kembo Mohadi, usethule ngokusemthethweni uhlelo lweNational Action Plan for Children IV (2026-2030) kunye lohlelo lweNational Child Online Protection Policy.
Inhlelo lezi zizanceda ukuvikela abantwana ekuhlukuluzweni lodlakela.
Ekhuluma kumbuthano weNational Child Protection Conference koBulawayo ngoLwesihlanu, uMsekeli kaMongameli uMohadi ugcizelele ukuthi inhlelo lezi zizancedisa ukuvika impilo zabantwana.
“Ngilethemba lokuthi inhlelo lezi zizakha isisekelo esiqinileyo sokuvikela abantwana njalo zilungise amaphutha abekhona. Sizenelisa ukunciphisa udlakela oluthinta impilo z5abantwana,” kutsho uMsekeli kaMongameli, uMohadi.
Uthe impumelelo yenhlelo kayisoze ilinganiswe ngamazwi kuphela kodwa ngokuguquka kwempilo yabantwana.
“Kumele sisuse abantwana ezitaladeni, sibakhuphe emsebenzini yokuba yizimbamgodi njalo siqinisekise ukuthi basezikolo. “Kodwa, imithetho iyodwa kayenelisi ukuqeda amasiko lemikhuba elimazayo. Kudinga ukuthi wonke umuntu asebenze ndawonye.”
Uthe uHulumende uzaqhubeka ebeka imithetho ecacileyo njalo ekhipha imbiko yokuhlola ukuqhubeka kohlelo ukuze konke kube segcekeni.
Unxuse ingatsha zikaHulumende, inhlanganiso ezizimeleyo, induna, umphakathi labaxhasi bentuthuko ukuthi basebenzisane ukuze uhlelo lolu lufinyelele abantwana abasemaphandleni labasemadolobheni.
Uphinde waqinisekisa ukuthi uHulumende uzasebenza ndawonye lamazwe akuzwekazi le-Africa, inhlanganiso zomphakathi emhlabeni wonke ukuqinisekisa ukuthi amalungelo abantwana ayavikelwa njalo lokuthi bakhulela endaweni ephephileyo.
Online Reporter