Online Reporter
Ethel Ncube
ABABONA ngezilimo ze-horticulture bakhuthaza abalimi ukuba baqhubeke bevikela izilimo zabo emqandweni ngoba isikhathi somqando asikapheli.
UMnumzana Simba Shumba ongu-specialist ku- horticulture uxwayise abalimi ukuthi bavikele izilimo zabo zingatshazwa, ikakhulu amatamatisi.
Ekhuluma lentatheli, uveze ukuba kulamalanga kuyakhudumala, okutsho ukuba amatamatisi awasatshazwa.
“Balimi kulezinsuku kuyakhudumala kodwa lokhu akutsho ukuba sekele ukuvikela izilimo zethu ezifana lamatamatisi kunye lembhida emqandweni.
“Amatamatisi adinga ukuthi endlalelwe utshani kumbe agonjolozelwe ukuze umtshazo ungafinyeleli kuwo.
“Okunye esikukhuthaza abalimi yikuthi bathelele ntambama phose nsukuzonke kodwa kungabi manzi kakhulu ngoba kuyehlisa ukutshazwa kwezilimo,” kubika uMnu Shumba.
Uqhubekele phambili eveza ukuba abalimi kumele bangakhohlwa ukuba nxa bevikela umqando kumele kungene ilanga.
“Nxa ugombolozele, wafulela phezulu izilimo zakho kumele emini uvule kutshaye umoya, ikanti amatamatisi ayadinga ukuba athole ilanga ukuze akhule kuhle.”
Uphethe ngokucebisa abalimi ukuthi loba bangaze babone kukhudumala bangalibali ukuthi umqando usesekhona ngoba yisikhathi sawo.
“Yebo kuyakhudumala kodwa asizameni ukuthi sivikele izilimo zethu emqandweni ngoba umqando usesekhona.
“Izilimo zingavele zitshazwe isivuno siyehla. Ngokunjalo, asiqhubekeni sivikela ukutshazwa kwezilimo ngumqando, ikakhulu amatamatisi, ukuze azale futhi avuthwe kuhle,” kuphetha uMnu Shumba.
