Online Reporter
Nkosilathi Sibanda
IMIDLALO yeCastle Lager Premiership isondelela amaviki amabili lanye kulimpelaviki lapho iHighlanders ezabe isemangweni ilande iScottland enkundleni yeRufaro.
Lo ngumdlalo olomthwalo kumqeqetshi weHighlanders uTry Ncube, osazama ukuthi athabise abalandeli beqembu abaphethe ngokukhonona ukuthi iqembu liyehluleka. Kuhlandla lakuqala lesizini, phakathi kwamaqembu la kwaphethwa kungutshiki lobhanqa ka 1-1, eMagumeni.
Ingena umango iqonde eHarare ngempelaviki, iHighlanders iyazi mhlophe ukuthi ilande impi ngoba iScottland layo ihlose ukuthi “ikutule” leliqembu elaziwa ngokuthi likhulu kunguqu yakuleli.
Abafana beMabvuku laba kunsuku ezedluleyo bebengenzi kakuhle enkundleni yeRufaro lapho asebethole khona imiklomelo emine, emidlalweni emine, bedliwa yiTelOne leCAPS United.
IBosso kumele ikunanzelele lokhu, ngoba ingafica “isilwane” esilimeleyo, iScottland ivukele phezulu kwayo.
Umqeqetshi weScottland uTonderai Ndiraya, utshele iZimpapers Sports Hub ukuthi bawulindele umdlalo omkhulu.
“Yebo, umkhulu lumdlalo. Akusoke kwabalula ngenxa yokuthi iHighlanders esidlala layo isanda kuthola ukunqoba ngakho izafuna ukuthi iqhubeke ikwenza lokhu. Kithi, siwuthathela phezulu lumdlalo. Siyawulungiselela.
“Njengoba sibuyela ukuyadlala ekhaya lethu, sikhangelele ukuthi sinqobe, siphume lemiklomelo yonke,” kutsho uNdiraya.
IScottland okwakhathesi ihlezi kunombolo yesine, ilemiklomelo engu-31, itshiyane ngemiklomelo eyisitshiya galolunye leSimba Bhora leMWOS ezisesiqongweni sengalane.
Inhloso kaNdiraya ngeyokuthi aqede isizini ephakathi kwamaqembu amahlanu aphezulu.
Enkambeni yeHighlanders ithemba likhona.
“Siphethe ithemba esihlala silalo kumidlalo yonke,” kutsho umqeqetshi weBosso uNcube, ongazange athande ukuthi aqhubekele phambili, ebika okunengi mayelana lomdlalo wabo leScottland uzakukhuluma ngoLwesine ekuseni.
Imidlalo yeCastle Lager Premiership kuliviki:
NgoMgqibelo: CAPS United v TelOne (Rufaro), Triangle v Ngezi Platinum Stars (Gibbo), GreenFuel v Bikita Minerals (GreenFuel Arena), Kwekwe Utd v Yadah (Bata), MWOS v FC Platinum (Ngoni), Chicken Inn v ZPC Kariba (Luveve), Manica Diamonds v Herentals (Sakubva), Simba Bhora v Dynamos (Wadzanayi)
NgeSonto: Scottland v Highlanders (Rufaro)
