admin
YiNtatheli kaMthunywa
UJOEL Luphahla umdlali wenguqu uthutshe ngendlela engacatshangelwayo ngokuphenduka kwakhe kuTsholotsho FC.
Udlale iminyaka eminengi eseSouth Africa lapho alimala khona unyawo edlalela iPlatinum Stars.
ULuphahla useveze ukuthi ulokhe elomdlandla wokukhethuza.
Ukhulume lokhu exoxisana loMthunywa lapho aveze okunengi ngokuma komdlalo wakhe kumidlalo eseleyo kulisizini.
Umdlali lo ubesehlezi isikhathi eside engalikhabi, lanxa esithi akulamuntu ongadlala njengaye kuwo wonke amathimu akhona kulisizini yeCastle Lager.
ULuphahla udlala emuva kwabagadli njalo osiyazi benguqu bathi kuminyaka elitshumi lanhlanu edluleyo kakho osedlale njengaye.
“Lokhe ngisalidlala ibhola. Amandla ngilawo njalo ngiyakutshela manje ukuthi akulamdlali ongamisana lami.
“Okumele ngikwenze yikunceda iTsholotsho ukuthi iyephambili. Nxa kungaba njalo, ngizenelisa ukuphiwa elinye ithuba ngomnyaka ozayo, abantu bazakubona engikutshoyo.”
Njengoba wake wabangumqeqetshi engakabuyeli phakathi kwenkundla, uLuphahla uthe akumkhathazi ukuthi adlale labafana abancinyane kakhulu kulaye. Uthe ukudlala labadlali abasacathula kumsondeza eduze labo njalo kumnikeza isikhathi esihle sokuthi abone ukuguquka komdlalo.
“Ukungadlali kumathimu amakhulu akutsho ukuthi angisalazi ibhola. ITsholotsho layo izakuba nkulu ngomunye umnyaka.
“Ngitshona ngilolonga labafana. Singabadlali sonke ngakho asibonani ngokuthi ngubani omkhulu.”
Ukhuthaze abadlali abasakhula ukuthi bengayengwa yimali kodwa bafunde ukubekezela lokudlala ngokuzimisela.
“Inguqu yethu isitshintshile. Kudala kwakulula. Khathesi sekufuna umuntu otshova ibhola umdlalo uze uyephela ngoba sekulomncintiswano. Sebebanengi abalethalenta la.
“Into engididayo yikuthi abadlali abakulezinsuku abakhuthali kunguqu. Babona angathi ukuba lethalenta yikuba lento yonke. Ayisikho lokhu. Imali ingabe isikhona kunguqu kodwa abafana bethu abaqale bafunde ukudlala okuzenza babe semlonyeni yabantu,” kutsho uLuphahla.
Umdlali lo wake watshibilikela iHighlanders kusukela ngo1998 kusiya ku2000, wasuka lapho waya ku AEP Paphos FC ezweni leCyprus.
Online Reporter