Uselemali uBulawayo Bomber

Lovemore Dube

UMDLALI wenqindi odume ngelithi “Bulawayo Bomber” uElvis Victor Moyo usesemalini ngemva kokuthola usekelo lwemali kunkampani yeBetterbrands.

Lokhu kuvezwe ngoLwesibili ngabeSerengeti inkampani ephethe inhlelo zalumdlalo. IBetterbrands yinkampani kasomabhizimusi wodumo kuleli uScott Sakupwanya, ophinda abengumnikazi weqembu lebhola eleScottland elikuCastle Lager Premiership.

UMoyo uyintshantshu kubanga le-heavyweight ku-EFC Mixed Martial Arts. Udumile kweleSouth Africa lapho aseleminyaka eyedlula itshumi lanhlanu ephila, esebenza njalo esilwa khona.

Umdlali lo uthakazelele kakhulu ukuza kosekelo lweBetterbrands ebika ukuba luzamphakamisa, lwenze akhangelane lokulolongela imidlalo ezayo. Abalandeli bakhe sebekhangelele ukuthi athathe umdlalo wakhe awukhweze kwelinye izinga eliphezulu.

“Bangane ngiyajabula ukubika ukuthi sengingumdlali weBetterbrands,” kutsho uMoyo.
Uqhubeke wathi: “Ngithanda ukubonga abeBetterbrands loScott Sakupwanya ngesipho sakhe esihle angiphe sona ekusekeleni umdlalo wami. Lokhu sokutshintshe amakhasi empilweni lasemdlalweni wami, kuzenza ngibelesikhathi esihle sokulungiselela.”

Ngalokhu uMoyo uthi ingqobe isikuye ukuthi aphakamise umdlalo wakhe lelizwe.
“Ngalolusekelo ngilethemba ukuthi ngizandiza phezulu ngenze abasekeli bami lelizwe lonke lijabule. Ngizizwa ngihlonitshiwe ngokusekelwa yiBetterbrands njalo ngizabamela ngesihle,” kutsho uMoyo odabuka eMaphisa eMatabeleland South, lobanje wakhulela eNketa laseNkulumane koBulawayo.

Oveze umbiko lo uMichelle Mitchell oweSerengeti uthe lokhu kutshengisa ukuzimisela kukaSakupwanya ekusekeleni ezemidlalo.

“IBetterbrands engaphansi kukaScott Sakupwanya izimisele ukuphathisa ukuthuthukiswa ezemidlalo kweleZimbabwe ngokusekela intshantshu yeMixed Martia Arts uElvis Moyo. Siyajabula ukwamukela uElvis Moyo njengengxenye yeBetterbrands esekelwa yithi kumidlalo yakhe,” lokungumbiko ovele kuBetterbrands.
Ingqobe isisele kuye okaMoyo ukuthi azifikise kuzinga eliphezulu.