Online Reporter
Brandon Moyo
OWAKE wabangukaputeni weqembu lamaChevrons uBrendan Taylor usebheke ngelihlo elibomvu ukuphenduka emdlalweni kulandela ukumiswa kwakhe okweminyaka emithathu ngecala lokwenza ubugwelegwele emdlalweni.
Isijesizo sakhe, esabekwa yinhlanganiso ye-International Olympic Committee (IOC) siphela ngoNtulikazi lonyaka.
UTaylor (39), wake wacabanga ukuthi abengumqeqetshi kodwa usecabange ukuthi aqhubeke ngokudlalela ilizwe ngemva kokukhuthazwa ngumaneja omkhulu weZimbabwe Cricket uGivemore Makoni.
Inyathelo leZimbabwe Cricket lihlose ukuthi uTaylor abeyingxenye yamaChevrons ngesikhathi kuqhutshwa iWorld Cup ka2027 ezabe iseZimbabwe, South Africa leNamibia.
“Lokhe ngifuna ukudlala njalo ngikholwa ukuthi ngingumdlali ozaletha untshintsho eqenjini. Ngiqine saka, engqondweni lasemzimbeni. Ngabe kangizizwa kanjalo, bengingasoke ngizimisele ukuphenduka. UGivemore (Makoni) ungisekele kakhulu kulokhu.
“Wahle wathi ngeke kwenze ukuthi ngibe ngumqeqetshi okwakhathesi. Wathi kimi, ‘Dlala kuze kufike iWorld Cups ka2027’. Ngaleso isikhathi ngiyabe sengileminyaka engu-41 yokuzalwa. Ngizimisele,” kutsho uTaylor ku-ESPNCricinfo.
Umdlali lo wavuma kuminyaka edluleyo ukuthi wayesebenzisa izidakamizwa lokuthi wayeqila kumidlalo ethile. Kulesikhathi lapho uTaylor abanjwa khona esebenzisa i-coccaine, eyitshaya ngamakhala.
Ividiyo yakhe eyitshaya, yabekwa emphakathini, okwadala ukuthi ayekele ukudlalela ilizwe ngoMpandula 2021. Wabikela i-ICC ngemva kwenyanga ezine, ngoZibandlela 2022.
“Kunengi okumele ngokwami. Bengiziqeqetsha ngingedwa,” kutsho uTaylor.
Loba esezaphuma kuzijeziso ze-ICC, uTaylor kasoke abakhona kuma-Chevrons mhla edibana le- England ngoNkwenkwezi kodwa engaba khona kumdlalo le-New Zealand ngoNcwabakazi.
“Ngizibona ngidlala kuma-Test lama-ODI. Kuma-T20 kuzamele ngisebenze, ngizilungiselele.
“Ngifisa ukuthi ngabe ngenza okunengi kuqembu lakithi. Ngaxolisa ngakho, asikhangeleni kwelakusasa.”
