Online Reporter
Raymond Jaravaza
USOMABHIZIMUSI odumileyo, owake waba ngukhansila koBulawayo u-Alderman uMohammed Hassen Esat, ungcwatshwe emathuneni e-Athlone ngoMvulo.
Udlule emhlabeni ngeSonto eleminyaka engu-80 yokuzalwa.
Imuli, abangane, osomabhizimusi, abakhokheli bomphakathi lezakhamizi zakoBulawayo bahlangane ukuzomvalelisa, beveza inhlonipho ngendima ayidlalayo kuntuthuko lenkululeko elizweni.
U-Esat ubengumqondisi wenkampani yemuli, iHM Esat and Sons, eyaziwa kakhulu ngokuthi yi-Esats Stores, ibhizimusi eselileminyaka edlula ikhulu liqhubeka koBulawayo.
Ngaphandle kokuba yisiphathamandla sebhizimusi, ubedume ngokweluleka abasakhulayo abafisa ukungena kwezamabhizimusi njalo ebancedisa ukuthi bazimele.
Abantu abadlula ezandleni zakhe bamchaze njengomuntu obelesineke, owayelalela izikhalazo zabo njalo ezimisele ukubona amabhizimusi abo ephumelela.
Ekhuluma emngcwabeni, ukhansila uPerseverance Nyathi uthe uMnu Esat ubengumuntu obenanzelela ithalenta njalo wafundisa abanengi ukuqakatheka kokubuyisela emphakathini.
“UMnu Mohammed Hassen Esat wayelodumo olukhulu ngenxa yobungcitshi bakhe kwezamabhizimusi. Wayengumuntu owayebona ikusasa, elolwazi olujulileyo njalo olwasiza abanengi ukuthi baphumelele,” kutsho uNyathi.
Uqhubeke wathi wafunda okunengi kuye, ikakhulu ukuqakatheka kokuncedisa umphakathi.
“Wayehlala enika asebekhulile labaswelayo ukudla ngoLwesihlanu maviki onke njengendlela yokubuyisela emphakathini. Lokho kutshengisa inhliziyo yakhe yokupha lokukhathalela abanye.”
Abantu abanengi bathe ibizo likaMnu Esat lizahlala likhona ngenxa yemisebenzi yakhe, indlela ayekhokhela ngayo lomusa awutshiyela uzulu wakoBulawayo.
