Online Reporter
Nkosilathi Sibanda
UMGIJIMI wakuleli uThandazani Ndhlovu uqhubeka ebhala kakutsha imbali yakhe kwezokugijima ngemva kokwenza kuhle emncintiswaneni we-400m eLucca, e-Italy, lapho aqede ngemizuzwana eyi-44.73.
UNdhlovu uphinde wabeka iMeeting Record kulowo mncintiswano njalo wenza isikhathi esingaphansi kwemizuzwana eyi-45,1 okwesibili empilweni yakhe yokugijima.
Impumela yakhe itshengise ukuqhubeka kokukhula kwakhe emncintiswaneni we-400m, okuyinto esimenze waba phakathi kwabagijimi abahlonitshwa kakhulu eZimbabwe lakwamanye amazwe.
Ngemva komncintiswano, uNdhlovu uvumile ukuthi wayengalindelanga ukugujima ngesikhathi esinjalo ngoba ubengezwa kuhle ngesikhathi efika e-Italy.
“Bengingalindelanga ukugijima ngaphansi kwemizuzu engu-45. Bengingezwa kuhle. Ngifike lapha ezinsukwini ezimbili ezedluleyo njalo bengicabanga ukuthi ngingagijima i-45.1 kumbe i-45 ngqo kuphela,” kutsho uNdhlovu.
Impumela yakhe ye-44.73 isiphakathi kwezikhathi eziphambili ezake zagijinywa ngowakuleli ku-400m, okuyisibonakaliso sokuthi usefika kwelinye izinga.
Lolu bekuluhambo lwakhe lokuqala olukhulu e-Europe kulisizini njalo uNdhlovu usetshengise ukuthi ulungele ukuncintisana labagijimi abasezingeni eliphezulu emhlabeni.
Abalandeli bezokugijima kuleli sebeqalise ukukhuluma ngamathuba akhe emiqhudelwaneni emikhulu ezayo, njengoba eqhubeka ethuthukisa izikhathi zakhe.
Ingcitshi kwezokugijima zithe ngendlela uNdhlovu aqhuba ngayo kusobala ukuthi angaphinda ephule amanye amarekhodi elizwe nxa eqhubeka ngokulolonga kanzima.
