admin
Fairness Moyana
KULOMFANA oleminyaka yokuzalwa engu-15 weLupane otshiye inkundla yeHwange ibulawa zimbambo kulandela ukucela umantshi ukuthi amxolele amekele alobole intombi yakhe eleminyaka yokuzalwa engu-12 nge$30 ayigcinileyo.
Umfana lo obemiswe emthethwandaba esetheswa icala lokudlwengula uncenge wagomela umantshi uDambudzo Malunga weHwange Regional Court ukuthi angamphoseli ejele ngoba ezimisele ukuthatha intombi yakhe efunda uGiredi 7.
“Nkosi bengizimisele ukumlobola, sikhuluma nje sengilemali engange$30 ngoba ngenza umsebenzi othile. Nxa imali ingeneli ngizacela umama angingezelele,” kutsho umfana lo.
Umantshi uqume ukuthi ayetshaywa inswazi ezine ngemva kokumesulela isigwebo sokuyapika ejele okweminyaka emibili.
Umtshutshisi uTawanda Sigauke ubikele inkundla ukuthi ontanga laba baqala ukuthandana ngomnyaka ka2014 njalo bahlangana emacansini kanye.
Kubikwa ngenyanga kaZibandlela umamangala wehlukana lomsolwa ethi kasamthandi. Mhlaka 3 Nhlolanja ngehola lesihlanu ilanga selisiya kunina umamangala wathunywa ukuyatheza inkuni ngugogo wakhe endleleni wahlangana lejaha lakhe leli elathi lizamncedisa ukutheza.
Kubikwa umsolwa ngaleso sikhathi wadonsela umamangala egangeni ngesandla wasecela ukuhlangana laye kodwa umamangala kazange amphendule.
“Umsolwa kukhanya wabona angathi ukuthula kukamamangala kwakusitsho ukuthi bayavumelana wahlangana laye emacansini ngaphandle kwemvumo yakhe,” kutsho uSigauke.
Umamangala kubikwa wathi efika ngakibo wabikela ugogo wakhe nanko phela wayesizwa ukuthi ulephunga waseveza okwakwenzakele. Indaba le yasibikwa emapholiseni.
Online Reporter