adminVADZIDZI vanosvika 20 vemuZimbabwe vakaita rombo rakanaka nguva yadarika apo vakawana mukana wekupihwa mabhezari ekunodzidza kuUnited Kingdom pasi pechirongwa cheChevening Scholarships icho chinotsigirwa nenyika iyi.
Vachitaura pakupa mabhezari kuvadzidzi ava muHarare, mumiriri weBritain muZimbabwe, Ambassador Catriona Laing, vakati vachanoita zvidzidzo zvakaita sezvemutemo, kutapa nhau, utano nezvemari.
“Gore rapera takapa vadzidzi vana chete mabhezari asi gore rino tapa 20 nekuona kuti dzidzo yakakosha, inoda kusimudzirwa,” vakadaro.
“Tine tarisiro yekuti vadzidzi ava vachadzoka vave neruzivo rwekusimudzira upfumi hwenyika vachiratidza hunyanzvi hwemabasa avanenge vadzidziswa kunze kwenyika nekuzodzidzisawo vamwe.”
Zimbabwe ine vanhu vakabudirira zvikuru vane chitsama avo vakadzidza pasi pechirongwa cheChevening Scholarships.
Chirongwa ichi chakatanga mugore ra1983 nedonzvo rekuti vadzidzi vazove shangwiti dzinosimudzira fundo yavo uye kubatsira vadzidzi vemunyika dzinosvika 162 pasi rose.
Online Reporter