adminSANGANO rakazvimirira, reTertiary Institutions Festival of the Arts in Zimbabwe (TIFAZ) riri kupa mukana kuvadzidzi vekumayunivhesiti nemakoreji wekuti varatidzire matarenda avo ezvipo zvemabasa emawoko pamwe nekupangana mazano.
Vachitaura pakuparurwa kwechirongwa ichi paMasvingo Polytechnic nguva pfupi yadarika, sachigaro wacho, VaAtanas Ruzive, vakati donzvo ravo rakananga kusimudzira matarenda evadzidzi vane zvipo zvemabasa emawoko sekudhirowa kana kuveza. “Vadzidzi vanowana mikana yekupanana ruzivo nekuratidzana mabasa avo sezvo vanenge vachibva kumayunivhesiti nemakoreji mumapurovhinzi akasiyana,” vakadaro VaRuzive.
“Chirongwa ichi tinochiita gore negore zvakare tichitenderera mapurovhinzi ose uyewo seTIFAZ, donzvo redu rakananga kusimudzira tsika, mitambo nemagariro mumayunivhesiti nemakoreji.”
Vanoti izvi zvinoenderanawo nechirongwa cheHurumende chekuvadzudza upfumi hwenyika, cheZim-Asset, icho chinokurudzira kutsigirwa pamwe nekusimudzirwa kwemabasa emawoko.
“Ndinokurudzira vadzidzi vachiri kupuraimari nekusekondari kuti vakoshese zvidzidzo zvemabasa emawoko uye kuti vazive kuti hazvisi zvemarombe sepfungwa dzine vamwe. Kune vakawanda vari kubudirira nazvo, zvidzidzo zvakanaka chaizvo.
“Kuvabereki, ndinoti musarambidza vana kuratidza pamwe nekuenderera mberi nematarenda avo,” vakadaro VaRuzive.
Online Reporter