admin
SANGANO rakazvimirira reGreen Light International Trust (GLIT) rinoti gore rino richawedzera rubatsiro rwarinopa kune vakaremara mitezo nedonzvo rekuti vakwanise kuratidza zvipo zvavainazvo.
Vachitaura pamusangano wavo wekutanga kwegore nguva pfupi yadarika, mukuru wesangano iri, VaTawanda Makwiramiti, vanoti vane chishuwo chekuvandudza mashandiro avo.
“Hurongwa hwedu hwegore rino hwakanangana nekuvandudza rubatsiro rwatinopa kune vakaremara. Kubva zvatakatanga sangano redu, rubatsiro rwedu tainyanya kupa kune vanhu vakaremara mitezo vakaita sevasingakwanise kufamba. Asi takazoona kuti chero nevasingaoni kana kunzwa vane matambudziko anoda rubatsiro rwedu.
“Gore rino tichaita kuti vanhu ava vaongororwe pachena nanachiremba vakuru vematambudziko aya.
“Mazuva ekuita izvi takatotara, kwangosara kuzivisa veruzhinji. Izvi zvinobatsira nekuti vamwe vachapihwa zvakaita semagogorosi ekuonesa pamwe chete nezvemunzeve,” vanodaro VaMakwiramiti.
VaMakwiramiti vakaenderera mberi vachiti kune vakaremara vazhinji vanotadza kuratidza zvipo zvavo nekuti vanotarisirwa pasi kana kuzvitarisira pasi pachezvavo munharaunda dzavagere.
Vanoti izvi zvichapedzwa nechirongwa chavari kuda kutanga gore rino cheInclusive Talent Exhibition Show chakanangana nekuti vakaremara varatidze zvipo zvavo mumabasa akasiyana uye mabhindauko avanoita.
“Munhu kana aine hurema hazvirevi kuti haana zvaanogona. Vanhu vakaremara pachezvavo havafaniri kuzvitarisira pasi kana kutarisirwa pasi nevasina hurema.
“Tichapa vakaremara mukana wekuratidza zvipo zvavo. Pazuva iri vane zvipo zvekuimba, mitambo, kugadzira zvigadzirwa nezvimwewo vachapihwa mikana yekuratidzira kuruzhinji. Izvi zvinoita kuti vawanewo mabasa pamwe chete nekuona mabhindauko ekuita achiunza mari,” vanodaro VaMakwiramiti.
Online Reporter