admin
Daphne Machiri
VAKOTI 29 vakapihwa zvitupa zvekupedza zvidzidzo zvemutauro wemasaini (sign language) pachipatara cheParirenyatwa Group of Hospitals izvo zvinotarisirwa kuvabatsira zvikuru mukuita basa ravo. Pavakoti ava, 25 vavo vanhukadzi uye zvidzidzo izvi vakaitiswa nesangano reDr Timothy Stamps Trust for Chronic Diseases.
Vachitaura pachiitiko ichi, Dr Stamps vakati vakavamba chirongwa ichi zvichitevera dambudziko rakatarisana nevanoshandisa mutauro wemasaini, avo vamwe vavo vasiri kuwana rubatsiro kuzvipatara nenguva nekuda kwekuti vakoti vanenge vasingakwanise kuziva zvavanenge vachida kubatsirwa nazvo.
“Ndicho chinangwa chikuru chakaita kuti zvidzidzo izvi zvivepo, tinovimbisa kuti tichatenderera mapurovhinzi ose tichiitisa zvidzidzo izvi nechinangwa chekuti munhu wose awaniswe utano hwakakodzera,” vakadaro.
Vachitaurawo pamhemberero idzi, sachigaro weHealth Services Board, Dr Lovemore Mbengeranwa, vakati zvakakosha kuti vakoti vakwanise kubatsira varwere vose vanouya kuzvipatara nemakiriniki.
“Chirongwa ichi takaona zvakakodzera kuti chinge chichiitwa muzvipatara nekuda kwekuti utano ikodzero yemunhu wose zvisinei kuti akaremara,” vakadaro Dr Mbengeranwa.
“Ranga riri dambudziko guru chaizvo kune vakoti kuti vakwanise kutaura nevarwere vanoshandisa mutauro wemasaini, kubvunza kuti vanorwara nei uye zvakare nekuti vakwanise kuvapa rubatsiro rwakakodzera. Ndizvo zvakaita kuti chirongwa ichi chiitwe.”
Online Reporter