happiness Chikwanha
Tandayi Motsi
VANHU 34 vafa muZimbabwe nekuda kweCovid-19 kusvika pari zvino uye huwandu hwevari kuwanikwa vaine chirwere ichi mushure mekuvhenekwa hwakwira kusvika 2 512.
Huwandu hwevanhu vafa hwakakwira zvichitevera kufa kwevamwe vaviri kuBulawayo nekuMashonaland Central nemusi weMugovera wadarika.
Pavanhu 2 512 vabatwa nechirwere ichi kusvika pari zvino, 518 vavo vakatonaya.
Bazi rezveutano nekurerwa kwevana rinoti vanhu 119 866 vavhenekwa hutachiona hwecoronavirus – hutachiona hunokonzera Covid-19 – munyika yose kusvika pari zvino.
“Kubvira pakatanga Covid-19 muno musi wa20 Kurume 2020, vanhu 2 512 vawanikwa vaine chirwere ichi uye 518 vavo vakanaya asi vamwe 34 vakafa,” rinodaro bazi iri.
Vanhu 78 vakawanikwa vaine Covid-19 musi muMugovera uye vanosanganisira 74 vagara vari muZimbabwe nevana (4) vakabva kuSouth Africa.
Dunhu reHarare ndiro rine vanhu vakawanda vawanikwa vaine Covid-19 vanove 771 uye rinoteverwa neBulawayo ine varwere 664.
Matabeleland South iri pechitatu nevanhu 365 vawanikwa vaine chirwere ichi uye Mashonaland Central ndiyo ine vanhu vashoma pamatunhu ose enyika vanove 27.
Hurumende iri kutora matanho akasimba akananga kurwisa kupararira kwechirwere ichi.
Matanho aya anosanganisira kusatendera veruzhinji kufamba pakati penguva dza6pm kusvika 6am.
Vane mabasa akakosha chete ndivo vari kutenderwa kuenda kumabasa uye vanofanirwa kuve nematsamba akakodzera anovatendera kufamba.
Online Reporter