Online Reporter
Kingstone Mapupu
VARIMI vanochengeta mombe munyika vari kukurudzirwa kupfuya dzemhando yeBoran, idzo dzinonzi dzinoshingirira kurarama munzvimbo dzine ufuro hushoma uyewo dzisingabatwi nezvirwere zvakawanda.
Kurudziro iyi yakapihwa nenyanzvi munyaya yekupfuya mombe, VaAlfonsi Chayambuka (66), vekambani yekuHwedza, avo vairatidzira mabhuru emhando yeBoran kushoo yevarimi ichangobva mukupera.
“Tiri kuno kushoo yevarimi yemuHarare, tichitaridza bhuru redu reBravo Boran BTR1960, iro rinorema makg 960, ratinotarisira kuti richawana mukombe rwendo rwuno. Rimwe bhuru hombe kune iri rakambowana mukombe kuno kushoo,” vanodaro VaChayambuka.
Murume uyu, anove maneja papurazi rezvipfuyo, anoti mombe dzerudzi rweBoran hadzinetsi kuchengeta uye hadzikurumidzi kubatwa nezvirwere zvose zvose.
VaChayambuka vanoti vanoshanda nemuridzi wepurazi, VaRichard Matewa, avo vanoti vanovawanisa zvose zvavanoda munyaya yekupfuya mombe.
“Mhando dzemombe dzeBoran hadzinetsi kuchengeta; dzinongoda kubaiwa majekiseni akakodzera nguva dzose nekudzipa mishonga inokurudzirwa. Muzhizha, mombe idzi dzinodya uswa hwekumafuro. Muchirimo ndimo matinodzitengera kudya kwemakireshi nezvimwe,” vanodaro VaChayambuka.
Bhuru ravakaunza kushoo iri vanoti rakaberekwa mugore ra2019.
“Mombe dzedu tinodzichengeta kuHwedza nekumwe kwakatsaukana, uko tinoita zvemombe chete. Chimwe chinhu chakakosha ndechokuti mombe dzinofanirwa kudhibhiswa nguva dzose,” vanodaro.
Vanoti gore roga roga vanounza mombe dzavo kushoo, dzichiwana mibayiro.
