KWAYEDZA

Kuchange kuri kumakwishu pamutambo wetsiva weUnity Day

Abel Ndooka

SHASHA yetsiva Patson Mutengwa acharwa nechinangwa chekuchengetedza bhande rake reWorld Alliance Boxing Association (WABA) Super Lightweight World Title apo achasangana naIsrael Kamwamba, wekuMalawi, musi wa22 Zvita pamutambo weUnity Day Boxing Extravaganza kuGweru.

Mutengwa akahwinha bhande iri muna Chikumi apo akakunda Efrain Esquivias Jr, wekuUnited States, mumutambo wakaitirwa kuZambia.

Sezvinotarisirwa nemutemo weWABA uye mamwe masangano anotungamira tsiva akasiyana-siyana, Mutengwa anofanira kurwira kuchengetedza bhande rake pasati padarika mwedzi mitanhatu.

PaUnity Day Boxing Extravaganza apa, mutambo waMutengwa naKamwamba ndiwo uchange uri muhombe pamisere inenge iriko, yekurwira mabhande akasiyana-siyana emunyika.

Pachiitiko ichi, Liberty Muwani acharwa naAlick Mwenda, wekuMalawi. Vacharwira bhande reLight Heavyweight International Title.

Mune mimwe mitambo, Kudakwashe ‘Take Money’ Chiwandire acharwa naSehliselswe Nhliziyo, vakanangana nebhande reSuper Bantamweight; Tinashe ‘Chairman’ Mwadziwana acharwa naJeremiah Mhere, vachivavarira kuwana bhande reSuper Featherweight; Tafadzwa Mushando achasangana naNyasha Phiri, vachirwira bhande reSuper Lightweight; Monalisa Sibanda achasangana naEmily Kubwalo, vachirwira bhande reLightweight; uye Zvikomborero Chemhere naEphraim Dzingisai vacharwira bhande reBantamweight.

Puromota wetsiva ane mukurumbira ari kuronga mutambo uyu Clyde Musonda, weDeltaforce Boxing Academy and MMA, akati gadziriro dzemutambo uyu dziri kufamba zvakanaka uye tarisiro yake ndeyokuona vatambi vazhinji vetsiva vachisimukira kuburikidza nechiitiko ichi.

“Tiri kumhanya, tichishanda nesimba, kuronga kuti mutambo wedu uyu ubudirire.

“Uyu unogona kuita kunge mutambo wetsiva chete, asi takasarudza kuti tigouita musi wa22 Zvita nechikonzero.

“Zuva iri rinokosha zvikuru munyika medu, naizvozvo tinovimba kuti vachauya kuzoona mutambo wedu vachadzokera kumba vaine zvidzidzo zvakawanda nokuti tiri kuita tichicherechedza zuva rinokosha zvikuru munyika medu,” akadaro Musonda.

Mutambo weUnity Day Boxing Extravaganza uyu unotevera weZimbabwe Independence Day Boxing Tournament, uyo wakaitwa muna Kubvumbi, warongwa zvakare neDeltforce Boxing Academy and MMA.

Leave a Comment