Online Reporter
YiNtatheli kaMthunywa
BONKE abalezivande zemibhida bakhuthazwa ukuba baqale ngokuthela umquba ezivandeni zabo ngaphambi kokuba balime imibhida yabo.
UMthunywa ukhulumisane loNkosikazi Semuliwe Sibanda obike ukuthi esikhathini esinengi okwenza imibhida ingakhuli kuhle yikuthi abantu bayabe belime nje emhlabathini ongelakudla.
“Okwenza uthole imibhida ingakhuli ngendlela yikuthi uyathola umuntu ehlanyele emhlabathini ongelakudla”, kuchaza uNkzz Sibanda.
Uqhubekele phambili esithi umquba akusiyonto edulayo ngoba uthatha owenkomo, owenkukhu kanye lotshani obomileyo konke nje kwenza umquba omuhle kakhulu uyefaka esivandeni sakho.
Ngalokhu ke imibhida yakho iba mihle kakhulu lehlamvu lakhona liyabe lilikhulu.
Ubuye wachaza njalo ukuthi abalimi abanengi bathi nxa sebefake lowo mquba balima imibhida yabo bamane bakhohlwe ukuwuthelela bengazi ukuthi imibhida elomquba ifuna amanzi amanengi kakhulu.
“Umlimi uthi angafaka umquba wakhe, walima lombhida asuke alibale lokuthelela leyo mbhida lokhu kwenza ingakhuli futhi ngoba imbhida elomquba ifuna amanzi amanengi ukuze ikhule kuhle,” kuchaza Nkkz Sibanda.
“Imibhida elomquba ingaswela amanzi eneleyo iyaphangisa ukubuna ngakho amanzi amanengi ayadingeka,” kuphetha Nkkz Sibanda.
