adminSIYADIBANA njalo mahlabezulu sicebisana ngendaba zakoCALA lomzali wakhe uSigilamkhuba. Kundatshana yethu edluleyo sikhuthazane ngokukhuza ulaka ngoba sivumelene ukuba induku kayiwakhi umuzi kodwa isiphetho sokulwa yikubulala, ukufa kumbe ukuyapika gadalala ejele abantwana belamba.
Lamuhla sizakhangela ngokunqoba kwamapholisa eZimbabwe Republic Police (ZRP) kuzigaba ezehlukeneyo kusukela ekulawuleni umthetho, ekubopheni izephulamthetho, emincintiswaneni kanye lasekulondolozeni impilo yoluntu ngezixwayiso ezingenani lezakoCALA.
I-ZRP ilawula umthetho lokuqhuba inhlelo zayo zonke isebenzisa amandla eyawanikwa nguzulu ku-section 219 wesisekelo semithetho yeZimbabwe (Constitution Amendment) Act Number 20). Kulawo mandla inhlanganiso le ilawulwa yiPolice Act (Chapter 11:10) okuyiwo umthetho ophawula imilayo lemithetshana yonke esetshenziswa yiZRP. Ngokunjalo, ngenxa yokubekwa nguzulu, iZRP kayehlukani lomphakathi ngoba amapholisa evele eqatshwe nguzulu ngakho kumele asebenze gadalala okusuthisa umqatshi wawo lo. Yikho lokho-ke okwaletha umbono wokuba umkhokheli weZRP uCommissioner General of Police, Khmrd, Dr. Augustine Chihuri; ethule izithembiso zamapholisa eziveza indlela amapholisa la akhangelelwe ukuqhuba ngayo umsebenzi wawo — Police Service Charter eka-1995.
Nyakenye, 2015 sokungemva kwamatshumi amabili eminyaka selokhe kwaphawulwa izithembiso lezi, uSikomitshi wamapholisa omkhulu lo uDr. Chihuri, uthuthukise izithembiso lezi, wazilolonga zihambelana lenhlelo zelizwe leZimbabwe ezigoqela olweZim Asset. Kulapho-ke okuqiniswe khona izithembiso lezi, engake ngazichaza kundatshana zethu zikaWatsha Tsotsi, zisiba yiPolice Client Service Charter. UDr Chihuri ukhuthaze uzulu ukuba aqinise usekelo lwakhe ngokusebenzisa indlela zokukhulumisana ezigoqela amaWhatsApp lokunye phezulu kwama-hotline lama-suggestion box. Indlela zokuxhumana lezi zipha uzulu ithuba lokubonisana lenkokheli zeZRP kukho konke okufaneleyo ekulawuleni umthetho lokulondoloza ukuthula ezigabeni. Uma kungaba lezikhalazo ngenkohlakalo phakathi kwamapholisa, ukunganaki amalungelo oluntu lokunye okunjalo, uzulu ulelungelo lokubika lezozikhalazo kuloba yiphi inkokheli yeZRP kuze kuyefika kuDr. Chihuri ngokwakhe. Amandla wonke la akuZRP avela kuzulu okuyikho okwenza inhlelo zeZRP ziphumelele njalonje ngakho kakumelanga kube lobumunyu kumanyano lo. Bikani zonke insolo zenu lisiphe lemibono yenu yonke ukuze silondoloze ubudlelwano bethu.
I-ZRP iqhubeka isebenzelana lozulu njalo umanyano lo unqoba mihla yonke ngoba kasibo bonke abantu abathanda amacala lezono phakathi komphakathi. Inengi liyawazonda amacala wona avele eyisono lakuMlimu. Iphumelele inhlanganiso le emadolobheni afana lasesigodlweni eHarare icebisana lozulu ngengozi yokuhuquluzelwa imali ngabazithi balezindlu kumbe indawo zokwakha izitanda emadolobheni beqamba amanga!
Kuqubuke abantu abathe xaxa kwabotshwa abanengi besetheswa amacala afana lalawa. Lalamuhla lokhe silikhuthaza bakwethu ukuba izigilamkhuba zilakho ukukuhlasela loba sikhathi bani ngoba zivele ziphila ngakho lokho kwephula umthetho. Kasazini ukuba indawo yokuhlala itholakala kubakhokheli bezigaba, abamakhansili kumbe umanisipala wedolobho elithile lakugatsha lwezombuso wezabelo (Local Government, Public Works and National Housing). Kundawo zokuthengiselana, tholani uncedo eCID Serious Fraud kumbe emapholiseni aseduzane lani balazise amagqwetha kuzwa lamahofisi afaneleyo awokuthengiselana izindlu lezindawo hatshi ukuthanda ukuthenga ngudlu sikhathi sonke!
Kulamanye njalo amacala agoqela ukugqekezwa kwezakhiwo, ukwebiwa kwempahla kulezo zakhiwo kumbe kwezinye izindawo nje, ukweqa imingcele yamazwe, ukubulala omunye umuntu ujongile, ukutshontshwa kwezifuyo, ukwetshulwa komthetho wezenkafulakufa (Firearms Act), udlakela ezindlini lokwehluleka ukugcina imuli (maintenance), ukudlwengulwa, lamanye anjalo akhankaselwe yiZRP kwaze kwatshisa phansi ngoba umanyano kazulu lamapholisa ‘utshise otsotsi’ abanengi ngendaba zamacala la. Siqhubeka sikukhuthaza mphakathi ukuba ungadinwa, phela inengi lamacala la avumbuluka ngemva kokwanjulelwa kwabantu ngemikhankaso le eveza ukuba isenzo esinje lesinje silicala. Yimpumelelo efezwe nguzulu kuZRP yonke leyo kukanti kwezemibukiso lemncintiswano, kasisakhulumi.
IZRP yiyo ephethe izicoco ezimbili zombukiso wesi-105 kweye-Zimbabwe Agricultural Show Society (ZAS) eqhutshelwa eHarare minyaka yonke. Izicoco lezi ngeze-Best Stand Exhibitor lese – Overall Best Stand ngo-2015.
E Trade Fair njalo, yiyo eyanqoba zonke inhlanganiso zezomvikela kuleli. Kwezemidlalo yeSouthern Africa Regional Police Chiefs Cooperation Organisation (SARPCCO) yiyo elenkezo ye-Overall Winners Trophy ngemva kokunqoba amapholisa emazweni wonke akumkhono wangeZansi yezwekazi leAfrika nyakenye. Lokhu isikwenze okweminyaka emine edluleyo okwenza ibe yingqungquthela yazo zonke inhlanganiso zamapholisa kulawomazwe kusukela ngo-1999 kusungulwa limncintiswano. Siphetha ngokulikhuthaza bakwethu ukuba linanzelele ukugalula lemikhuhlane eyande ukubhaha ngalesisikhathi sezulu, kungakhathalekile ukuba libonakala sengathi liyaklayela ukuna kwalo lonyaka. Kasilondolozeni impilo ukuze siqhubeke sinqoba empilweni, sithokoza njalo silamandla okulwa lecala kunye lesono emhlabeni. Siyabonga, sidibane kwelizayo.
Thumelani imibono yenu kunombolo yeWhatsApp u–0783 185 092 kumbe ebulenjini [email protected]/[email protected] / [email protected]
Online Reporter