admin
Ngu Lucky Tshabalala
INHLANGANISO ebona ngempilakahle yezifuyo isikhuthaze abalimi abafuye inkomo ukuthi bazikhiphe zisaqinile bazithengise bangalindi ukuthi zize zicube.
Lokhu kulandela ukusilela kwezulu eziqintini ezinengi zesabelweni seMatabeleland North osokubangele ukuthi izifuyo ziswele amadlelo.
Ekhuluma lephephandaba likazulu uDokotela wezifuyo, uPollet Moyo ukhuthaze abalimi ukuthi behlise inani lenkomo zabo ngokuthengisa ezinye.
“Abalimi abathengise ezinye inkomo zabo esezikhulile zingakacubi ngendlala ukuze benelise ukuthengela ezinye ukudla,” kutsho uDkt Moyo
Ubuye waqhubekela phambili walandisa ngokuthi eziqintini ezinengi amadlelo asesilela.
“Eziqintini ezinengi zeMatabeleland North abalimi bakhala ngendlala ngoba izulu lonyaka kalizange line kuhle osekubangela ukuthi inkomo zihambe umango omude zisiyadinga amadlelo,” kuqhubeka uDkt Moyo
UDkt Moyo ubuye wathi okubalulekileyo khathesi yikuthi abalimi nxa bengasehlisanga inani lezifuyo zabo kumele babe lamacebo okuzidingela ukudla.
Ukusilela kwezulu lokhu akwesabisi abalimi abafuye inkomo nje kuphela kodwa lalabo abalimileyo emasimini.
Eziqintini ezifana leBubi le Ntabazinduna abalimi abasoze bavune okuyangaphi ngenxa kokutshisa kwelanga.
Online Reporter