Online Reporter
Amasotsha e-SANDF eLimpopo abhekane lengwadla yokuqapha umfula ohlukanisa elakuleli leZimbabwe nanko kwanda izimota ezebiweyo ezitholakala zichatshiswa emfuleni zibheke kuleli.
Ngeviki edluleyo, amasotsha eSouth Africa ophiko lwe-4 Artillery Regiment asebenza ngaphansi kohlelo lwe-Joint Operations Limpopo ahlwithe impahla engekho emthethweni kanye lemota yohlobo lwe-Range Rover ebiza ngaphezu kwe-R3,6 million ngesikhathi eqhuba umsebenzi wokuqapha umngcele phakathi kweSouth Africa leZimbabwe:
IRange Rover ebiza u-R1,3 million yatholakala emfuleni uLimpopo ngemva kokuba abasolwa beyitshayele bangena layo emanzini ngesikhathi bezama ukubalekela ukubotshwa.
Okunye okutholakeleyo yimpahla engekho emthethweni ebiza i-R44 000 endaweni yeMalalahoek. Kanye legwayi elingekho emthethweni elibiza u-R2,34 million eduze kwe-Echo Station 1.
IFord Everest ebiza i-R1,3 million layo itholakale ibhajwe emfuleni uLimpopo ngemva kokuthi amasela ezimota ezame ukuwela ngayo ebalekela amasotsha abeqaphe umzila.
Ngesikhathi imota ibhajwa, amasela agxume aphuma kuyo abesebaleka ngenyawo engena eZimbabwe, ngaleyo ndlela ephunyuka ekubotshweni. Kusenjalo, eduze kwe-Echo Station 1, amasotsha avimba impahla eyayithwele amabhokisi egwayi ongekho emthethweni obiza R2 344 845.
I-SANDF income imizamo yamasotsha athunyelwe emngceleni, ichaza imisebenzi yawo njengengadinwa ekulwisaneni lobugebenga obuwela imingcele.
“Izinduna lamadoda kanye labesifazane be-4 Artillery Regiment bayala ukulala ebusuku. Yikho imisebenzi yabo iphumelela,” kutsho i-SANDF. — IOL
