admin
Basekhona abadlali abasalondoloza amasiko ethu, kuliviki iphephandaba likazulu lidibane lomunye wabaculi bakamaskandi uLawrence Ncube odume ngobungcitshi bakhe kumculo kamaskandi. UNcube kapheleli ekuculeni nje kuphela kodwa utshaya leziginci. Ingxoxo elandelayo iphakathi kukaKearabiloe Nare (KN) intatheli kaMthunywa loLawrence Ncube (LN). Kulingxoxo uNcube uxoxa kabanzi ngempilo yakhe, ezomculo kanye ledlalade llakhe lesibili.
KN: ULawrence Ncube ngubani njalo udabuka ngaphi?
LN: NginguLawrence Ncube, umculi wemaskandi odabuka ePhumula, Plumtree ngaphansi kwenduna uKandana lo sobhuku uMakhulela njalo ngazalwa ngomnyaka ka1981.
KN: UMthwakazi ufisa ukwazi ukuba waqala nini ukucula njalo wandise ukuculela ngaphi?
LN: Ukucula yinto engayiqala ngisesemncane kakhulu kodwa ngenxa yokuswelakala kwamathuba angizange ngenelise ukuthi ngazakale emphakathini. Ekuqaleni bengicula irumba kwasekuthi ngo2009 ngasungula elami iqembu lemaskandi okuthiwa yiThabathani eliyilo engihlabela lalo kuze kube lamuhla. Sihlabela siseJohannesburg eSouth Africa yiloba siyake sivakatshele ezinye indawo sihamba ngomculo wethu. Kuqembu leli sihlabela singu-9.
Siqala leliqembu sasibabili, kuyimi lenye indoda okuthiwa nguNkwanyana onguye engitshaya laye iziginci.
Sahwatsha idlalade lokuqala ngomnyaka ka2010 elibizwa ngokuthi Iphikankani njalo ingoma eyakhanya ithakazelelwa ngabantu kulelodlalade yiyo ethi Iphikankani. Ngo-2012 sasungula iMaskandi Festival lapho okwakuhlangene abahlabeleli bakamaskandi labe mbube. Ngakho-ke lamuhla ngizokhuluma ngedlalade lethu lesibili.
KN: Akusichazele ukuba umculo kamaskandi wandise ukulalelwa ngobani njalo singabe sikhona isicoco eselithe lasithola?
LN: Ngokubona kwami umculo lo kawukhethi, ulalelwa ngamaqembu onke nje kungakhathalekile ukuthi uleminyaka emingaki, ungumama kumbe owesilisa. Umculo wethu wandise ukutshaywa ku Radio Zimbabwe lakuNational FM ngakho senelisa ukungena ku-Top 20 Best songs of the year kuRadio Zimbabwe ngo2000.
KN: Usungazisa-ke uMthwakazi ngedlalade lakho lesibili.
LN: Idlalade lethu lesibili libizwa ngokuthi Inqaba njalo liphume ngoLwezi nyakenye. Lelidlalade lilengoma elizitshumi ezibalisa ezithi Izidakamizwa, Ifa leziwula, Suk’eduze, Inqaba, Inja Yam’, Ngiyoze Ngifike, Inkinga, Umendo loYise Wezintandane. Idlalade leli lijonge ukufundisa ngamasiko, ukulaya kanye lokukhuza njalo ngibona uMthwakazi uzalijabulela kakhulu ukwedlula elokuqala.
KN: Kungabakuhle Ncube ungasithi fahlafahla ngomculo wakho, yindaba wakhetha lumculo?
LN: Ngakhetha imaskandi ngoba ngiwuthanda lumculo, esikhathini esinengi loluhlobo lomculo alusilo lokuzithokozisa kuphela kodwa luthwala imilayezo eyakhayo. Umculo lo uvuselela amasiko ukuze singaphunyukwa yibuntu bethu.
KN: Izembatho zenu yizembatho nje kumbe kukhona ezikumeleyo.
LN: Njengokuba ngike ngatsho ukuba ukuvuselela amasiko kaMthwakazi ngezinye zezinjongo zomculo lo, izembatho zethu akusimceco nje kuphela. Esikugqokayo kubizwa kuthiwe liwaba, leli libhetshu lebutho lokucina lenkosi uLobengula.
KN: Yibuphi ubunzima osuhlangane labo njengomhlabeleli njalo nkuthazo bani oyitshiyela abanye abahlabeleli?
LN: Inhloso yomculo kahle kahle yikuthi sizojabulisa abantu sibakhuthaze lokuthi bekele okubi benze okuhle kodwa nxa sekusiba lokungazwani kahle phakathi kwabaculi umculo ucina ungasamuleki kuhle emphakathini ngakho isifiso sami yikuthi njengabaculi siqhubeke sibambisana kungakhathalekile ukuba ucula mculo mhlobo bani ngoba phela umaskandi ungaba yirumba, i-gospel njalo kungumculo wokuzijabulisa. Nxa singabambisana ngicabanga ukuthi singayaphambili njengamaAfrica.
Online Reporter