admin
Abel Ndooka
Vabereki vokurudzirwa kushingairira kudzidzisa vana vavo nedonzvo rekuti vagozove neremangwana rakanaka sezvo dzidzo iri iyo nhaka yeupenyu.
Kurudziro iyi yakaitwa nguva pfupi yadarika naVaSam Manyoni, avo vanove business unit manager wekambani yeFraser Alexander kudunhu reAfrica, pachikoro cheRobin Hood Pre-school, kuKadoma, apo vaive muenzi anoremekedzwa pakupedza zvidzidzo kwevana vepo.
“Kuti vana venyu vagove neupenyu hwakanaka, zvakakosha kuti vawane dzidzo yakakwana uye yepamusoro. Naizvozvo endesai vana kuchikoro vanodzidza. Hazvina basa kuti zvakaoma sei, vana ngavawane fundo. Edzai nepamunogona kuti vaende kuchikoro ramangwana ravo rivakwe,” vanodaro.
VaManyoni vanoti vabereki vanofanirwa kushuvira kuti vana vavo vararame upenyu huri nani kudarika hwavo.
“Sevabereki, shuviraiwo kuti vana venyu vararame upenyu hwepamusoro hwakasiyana nehwamunenge muchirarama imi. Ini ndakakurira kumugodhi upenyu hwakaoma, asi vabereki vangu chavakandigonera kundiendesa kuchikoro uye nhasi ndasvika pandiri nekuti ndakaramba kurarama upenyu hwandakakurira,” vanodaro VaManyoni.
VaManyoni vanovimbisa kuvandudza swimming pool yepaRobin Hood Pre-school nedonzvo rekuti vana vepo vakwanise kuita zvidzidzo zvekutuhwina.
Online Reporter