admin
Munyori weKwayedza
MASANGANO evechidiki muguta reHarare akabatsira nezvinhu zvekushandisa pakudzivirira Covid-19 muzvikoro sezvinodiwa pasi pemitemo yakatarwa neWorld Health Organisation (WHO).
Danho iri rinotevera kuvhurwa kwezvikoro neMuvhuro uno.
Zvikoro zvabatsirwa zvinosanganisira Hatcliffe Primary 1 ne2, Hatcliffe Secondary School neSelonga Cluster Schools kuGwanda.
“Chikamu chedzidzo chemuZimbabwe chakakanganiswa nekuda kwechirwere cheCovid-19 uye takazvipira kubatsira vana avo vane fundo yakadzoserwa kumashure nekunyuka kwechirwere ichi,” chinodaro chinyorwa chakabva kumasangano aya.
“Svondo radarika takapa zvinhu paHatcliffe 2 Primary School apo taipa zvekushandisa muchikamu chechipiri chechirongwa chedu kuHatcliffe Primary 1 ne2 uye neHatcliffe Secondary School.”
“Tiri kukumbira kune vane mwoyo wetsitsi kuti vabatsire nezvinhu zvakasiyana nechinangwa chekuyamura zvikoro zvisingakwanise kuzvimiririra, kunyanya zvekumaruwa.”
Zvinhu zvawanikwa nemasangano aya zvekurwisa kupararira kweCovid-19 kusvika pari zvino zvinosanganisira mathermometer, mamasiki nemimwe mishonga.
“Muchirongwa cheSafer Schools Campaign tiri kubatana nezvikoro nemasangano anoshandira munharaunda mukubatsira vanhu nezvikoro kuti vazadzikise zvinodiwa neWHO mukurwisa Covid-19.
“Nharaunda dzatiri kunyanya kubatsira ndeidzo dzine vanhu vanoshaya vane vana vasingakwanise kuwana fundo yepadandemutande,” anodaro masangano aya.
Zvikoro zvakavhurwa neMuvhuro uno kuvadzidzi vari kunyora bvunzo dzekupera kwegore dzeGiredhi 7, Fomu 4 neFomu 6.
Vana veGiredhi 6, Fomu 3 neFomu 5 vachavhura nemusi wa26 Gumiguru kuchitiwo vamwe vose vanosanganisira ECD A neB, Giredhi 1 kusvika 5 uye Fomu 1 ne2 vachavhurwawo musi wa9 Mbudzi.
Online Reporter