admin
Muchaneta Chimuka
MURUME wekuChitungwiza akamiswa mudare reko nemhosva yekuba girosari raisanganisira rofu rechingwa nemajarini acho.
Girosari rakabiwa muchitoro cheTM Pick n Pay Supermarket rose rinokosha RTGS$67,84 .
Mutongi wedare reChitungwiza Magistrates’ Courts, Tendai Mutamba, akapa Simbarashe Chinyakata (41) wepanhamba 131 Unit F chirango chekubvisa faindi yeRTGS$134,68 uye kukundikana kwake achanogara mujeri kwemwedzi wose.
Muchuchisi Itai Beulah Chikono akaudza dare kuti nemusi wa2 Chikumi munguva dzemasikati, Chinyakata akapinda muchitoro cheTM Pick and Pay chiri paMakoni achibva aisa girosari mungoro (trolley).
Girosari iri raisanganisira rofu rimwechete rechingwa, 2kg furawa, mushonga webhutsu mumwechete, 500g jamhu, 250g majarini, 500ml lacto, 250g polony, sipo dzerudzi rweJade mbiri ne2kg yemupunga.
Chinyakata akabva asunda ngoro yaive negirosari iri achibuda muchitoro asina kubhadhara.
Zvisinei, midzimu yake yakabva yadimbura mbereko apo akabatwa nemupurisa anomema muchitoro ichi, Isaac Manhanga, achibva akundikana kuburitsa risiti inoratidza kuti ainge abhadharira zvinhu izvi.
Akatanga kutaura achiruma-ruma rurimi achiti pane mumwe munhu ainge amubhadharira asi zvakashaya umboo zvikaita kuti asungwe.
Chinyakata anobvuma mhosva yake yekuba.
Online Reporter