Online Reporter
Yintatheli kaMthunywa
INGCITSHI kwezokulima sezixwayise abalimi ukuthi balime amakhabe ngoba alakho ukuletha inzuzo enhle.
UMnumzana Mduduzi Dube onguAgronomist kunkampani ye-AgriSeeds ukhuthaze abalimi ukuthi balime amakhabe bezitshayele imali. Uthe amakhabe avuma ngesikhathi sokutshisa.
“Amakhabe alinywa ngesikhathi sokutshisa kusukela ngenyanga kaNcwabakazi kusiyacina kuLwezi. Sikhuthaza abalimi ukuthi baqale ngokulungisa umhlabathi bengakafaki inhlanyelo yabo phansi.
“Sikhuthaza abalimi ukuthi benze imibheda engaba yi-10m ubude njalo imibheda le kumele ibe lezikhala ezingaba yi 1,2 kusiya ku-2m phakathi,” kutsho uMnu Dube.
Uqhubekele phambili esithi amakhabe ayatshiyana njalo lokuthi kumele alinywe emhlabathini onjani kuya ngokuthi yiwuphi umhlobo ofuna ukuwulima.
“Amakhabe kafuni kulinywa emhlabathini olivutshevutshe futhi ulobumunyu obuphakathi kwe-5,8 kusiya ku-6,2 njalo kumele elinyelwe kuma-well drained loamy soils.
Sikhuthaza abalimi ukuthi bevule izikhala eziyi-60 kusiya ku-90cm phakathi nxa behlanyela inhlanyelo yamakhabe,” kutsho uMnu Dube.
Uthe kulemihlobo yamakhabe agoqela iFahari F1 kanye le Baraka F1.
“I Fahara F1 ngumhlobo omnandi kakhulu njalo okhipha izithelo ezinkulu njalo ulombala oyi-dark redish le light green. Umhlobo lo kawuphuzi ukukhula.
“Kukanti i-Baraka F1 ngumhlobo wekhabe omnandi njalo olombala oyi-dark green ngaphandle le dark redish phakathi, njalo ukhipha izithelo eziyi-2 kusiya ku-5 ngesilimo esisodwa,” kutsho uMnu Dube.
Uthe amakhabe athatha amaviki angu-11 kusiya kwangu-17 ukuze avuthwe.
“Amakhabe athatha amaviki angu-17 ukuze avuthwe njalo sikhuthaza abalimi ukuthi nxa sebevuna bevune ekuseni ilanga lingakatshisi kakhulu ukwenzela ukuthi engatshiswa lilanga isikhathi eside.
“Kumele athi angavunwa aphangise afakwe endaweni elomthunzi,” kuphetha uMnu Dube.
