adminSandy Musungata
IMWE chembere yakasvimha misodzi mudare ichiti yaoneswa nhamo nekurohwa pamwe nekutukwa zvinyadzi nemwanakomana wayo gotwe.
Loice Chesa akaendesa Allen Chesa (27) kuHarare Civil Court achiti amupfuvisa.
“Changamire, ndatambudzwa nemwanakomana wangu gotwe wandaifungidzira kuti ndiye achandichengeta sezvo ndachembera. Asi anomisidzana neni kunge ndine zera naye.
“Anondirova zvekuti mumwe musi ndakamubvunza kuti sei akanga apaza imba akatora midziyo yaisanganisira amplifier kwave kunotengesa ndokubva andirova nekunditorera foni yangu. Akati ndipei $20 kuti ndikudzoserei kana kuti ndokuurayai, ndokubva ndaburitsa $10 yandaingova nayo kwave kuzondiregedza. Ndava kutyira hupenyu hwangu,” akadaro.
Loice akati mwana wake anomutukirira nezvinyadzi.
“Akatanga kundituka munoshaya pekutarisa nekuti anotukirira zvese zvemukati asi ndini amai vake vakamubereka. Dai aidhakwa ndaiti zvimwe hwahwa hunomudariso.
“Ndikapakura zvokudya anotora ozvirasira kumeso kwangu. Chinonyanya kundishungurudza pakuita kwake kwese kushaya ruzivo rwekuti sei achindidaro zvekuti akandiudza ndakasununguka kumuregerera ndogadzirisa. Ndikada kuti ndigare naye pasi anobva atotanga kunditukirira,” akadaro Loice.
Akati vakoma vaAllen vakakandawo mapfumo pasi nekuda kwemaitiro ake.
“Anogara achitaura mashoko ekuti endai munogara kumusha kune dzimwe chembere nekuti muchazobva pano mava chitunha ndakuurayai,” akadaro Loice.
Allen akaudza dare kuti zvaitaurwa naamai vake zvakasangana chokwadi nenhema.
“Hongu, zvimwe zvavataura ndinoita, handina chikonzero chandingapa kuti sei ndichidaro. Asi kubva ndichikura, amai vaingondiita ‘rough’ saka zvaingondibhowa,” akadaro Allen.
Mutongi Barbra Mateko akapa gwaro redziviriro kuna Loice.
Online Reporter