Online Reporter
Abel Ndooka
MWAKA wenhabvu weCastle Lager Premier Soccer League wa2025 uchatanga nemusi weChishanu svondo rino apo vakomana vatsva veScottland FC vachatatsurana neTriangle United.
Svondo radarika, Dynamos yakasangana neSimba Bhora mumutambo weCastle Challenge Cup uyo unotambwa nezvikwata zvinenge zvakahwina mukombe weCastle PSL neChibuku Super Cup mwaka wadarika.
Mutambo uyu wakazohwiniwa neDeMbare chikwata chaLloyd ‘Mablanyo’ Chigowe icho chakakunda Simba Bhora 5-3 kumapena sezvo wainge wapera uri mangange 1-1.
Scottland FC ichasangana neTriangle United kuRufaro Stadium muHarare nemusi weChishanu.
Chikwata cheScottland chimwe chezviri kutarisirwa mwaka uno nekuti chakapinda muPSL ndokubva chatanga kutenga vatambi vakawanda vepamusoro vanosanganisira Khama Billiat, Walter Musona, Lynoth Chikuhwa naGodknows Murwira.
Pamusoro pezvo, Scottland yakatora Tonderai ‘Stanza’ Ndiraya kubva kuSimba Bhora achangobva kuhwinisa chikwata ichi mukombe wePSL kurakidza kuti mwaka uno yakaurongera zvikuru. Nerimwewo divi, Simba Bhora iri kutanga nekurwira kuchengetedza mukombe wayo wePSL iri pamusha payo apo ichasangana neFC Platinum kunhandare yeWadzanayi Stadium kuShamva nemusi weMugovera.
Simba Bhora mwaka uno ichange ichirairidzwa naJoel ‘Dubai’ Luphahla uyo akatsiva Stanza.
DeMbare, iyo yakagara mudenga rechinomwe zvichitevera kuhwina kwayakaita mukombe wayo wekutanga svondo radarika, ichange iri pamusha payo muHarare ichitatsurana neZPC Kariba nemusi weSvondo.
Vamwe vakomana vatsva zvekare veMWOS vachasangana neHighlanders kuBaobab Stadium nemusi weSvondo.
