Online Reporter
Abel Ndooka
CHIKWATA chenyika checricket chemaChevrons chichaenda kuTrent Bridge, kunyika yeEngland munaChivabvu kunotamba mutambo mumwechete weTest Match nemaThree Lions.
MaChevrons akapedzisira kuenda kunotamba nechikwata cheEngland mugore ra2003.
Mutambo uyu wakagamuchirwa zvikuru neZimbabwe Cricket iyo iri kushanda zvakasimba kusimudzira cricket uye izvi zvinotevera kutamba kwakaita maChevrons neIreland nguva pfupi yadarika mumitambo yeTest Match, One Day International Series neyeTwenty20 International Series.
Muchinyorwa chakabva kuZimbabwe Cricket, sachigaro wesangano iri – Tavengwa Mukuhlani – anoti mutambo weZimbabwe neEngland uchabatsira zvikuru mukusimudzira cricket. Anoti shuviro yeZC kuona maChevrons achidzokera pachinzvimbo chaaive kare mumutambo uyu.
“Isu seZimbabwe Cricket, makore 10 adarika range riri basa redu neshuviro yedu kuti tidzokere pamusoro mucricket pasi rese, izvo tine chivimbo chekuti takwanisa kuzviita.
“Zvichangobva kubuda mumutambo wedu neIreland zvinotipupurira kudaro.
“Tiri kusimukira, ndine chivimbo chekuti ticharamba tichisimukira uye tichazvirakidza munaChivabvu patichaenda kuEngland,” anodaro Mukuhlani.
Mutambo uyu unotevera hurukuro dzakaitwa namanaging director weZC – Givemore Makoni – neaimbove chamangwiza weEngland and Wales Cricket Board, Tom Harrison.
Mukuhlani anoti: “Tinoda kutenda managing director wedu, Givemore Makoni neaimbove chamangwiza weECB, Tom Harrison, avo vakashanda nesimba vachiita hurukuro nevanhu vakasiyana vari kuECB kuti mutambo uyu ubudirire.”
