Online Reporter
Abel Ndooka
KUCHANGE kusingadanwi anonzwa kuRimuka Stadium kuKadoma musi weChishanu chino apo vatambi vanobva kumapurovhinzi akasiyana-siyana vachakwikwidzana mumitambo yemabhora yeAssociation of Independent Colleges in Zimbabwe (AICZ).
Mapurovhinzi manomwe achange achitatsurana munhabvu yevakomana nevasikana, netball, volleyball nebasketball mumapoka emazera anoti Under-17 neUnder-20. Mapurovhinzi aya anoti Harare, Masvingo, Mashonaland East, Mashonaland Central, Mashonaland West, Midlands neManicaland.
Muhurukuro neKwayedza, national organising secretary weAICZ — Vincent Cheure — anoti mitambo iyi yakakosha zvikuru sezvo ichibatsira nekuwanisa vadzidzi vemuzvikoro mikana yekusimukira mune zvemitambo.
“Achange ari makuwerere kuRimuka nekuti tine mapurovhinzi akasiyana-siyana achauya kuzokwikwidzana mumitambo inoti nhabvu, netball, volleyball nebasketball.
“Mitambo yakakosha muzvikoro nekuti kune vadzidzi vane zvipo zvakasiyana-siyana, saka kusangana pakadai kunobatsira zvakanyanya mukusimudzira zvipo zvavo,” anodaro.
Cheure anoti pachatambwa mitambo iyi, pachange paine varairidzi vezvikwata zvenhabvu nevezvikwata zvemimwe mitambo, vachiongorora vatambi.
“Takakoka varairidzi kuti vauye kuzoona mitambo yedu iyi nokuti shuviro yedu kuti vatambi vedu vagoonekwe uye vawane mikana yekuzoenda kunotambira zvikwata zvakasiyana-siyana,” anodaro Cheure.
Zvikwata zvichakwikwidza zvakaumbwa nevatambi vanobva kuzvikoro zvakatsaukana-tsaukana.
