adminnaEmmanuel Chimombe
Charovedzera charovedzera
Bveni rakakwira mawere kwasviba.
Zvimiro zvavanhu zvazungurwa
Unhu hwedu hwapera kupepetwa
Veduwe-e watsapu akatiroya akazunza negona rose .
Chizvarwa chedu charemadzwa
Vana votobereka dzava mhandu kunesu.
Baba namai havana achaziva .
Vatezvara naambuya vava vana sahwira.
Moyo yedu yapepetwa nechirungu.
Ugo noumwe hwetsika dzamadzibaba edu
Hazvichisina nvimbo muhana dzedu
Uye hazvina achazvirota.
Kuudza kunenge kutoudza matsi.
Kupedza nguva kutsonya ari murima.
Tsika namagariro zvadzama samadora
Nemhaka yako iwe facebook.
Rurimi rwedu haruchina ane hanya narwo
Pamusaka pako iwe wekuuya nenyanza.
Zvemidzimu; makombwe, nejakwara dzakazvifuratira ndumure.
Tochingoringa tione pazvichasvika.
Zvainyadzisa zvave zvedambe nazvo;
Mwanasika” otamba nababa kunge muramu .
Zvaiera hazvina achazvieresa.
Chokwadi internet une chitema
Ndiwe wakonzera vana ujoki .
Newewo wifiy uri mharadzi mhunzamusha.
Vari mabweadzivawee dzosai vana venyu vorasika.
Vorasikawo here makayeva.
. Emmanuel Chimombe ari muU6 Arts paMwenezi Govt High School, kuMasvingo.
MAONERO:
Nhetembo ino, kufanana nenhetembo zhinji dzevana vechikoro, yaita mbodza nekuda kwekusashandisa zvimiso, zviturabefu nezvimwe zvinoita kuti nhetembo kana chinyorwa chiverengeke zvakanaka.
Iyi nyaya yatangira pamanyorero aitwa musoro wenhetembo chaiwo. Nyanduri angoti, “Chirungu chenyu ichi.” Hatizive kuti anoda kuti vanoverenga vakanuke here kana kuti vaverenge mazwi aya semubvunzo.
Kushandiswa kwezvimiso, kana mibvunzo kana kukanuka kunobatsira ari kuverenga kuti azive maverengero anoenderana nezvanga zvichidiwa nemunyori.
Nhetembo iyi yatanga netsumo yekuti “Charovedzera, charovedzera gudo rakakwira mawere kwasviba.” Asi ndichitarisa zvinoreva tsumo iyi, ndashaya hukama hwayo kana kuti kukodzera kwayo munhetembo iyi. Asi chagonekwa nanyanduri kushandisa mutauro wezviito zvekugadzira zvakohwewa pachiraswa marara – kuzungura nekupepeta.
Izvi ari kuti ndizvo zvaitika nehunhu hwedu nekuda kwezvinhu zvechiRungu zvakaita seWhatsApp. Kuratidza kunyatsokanganisika kwaitika muvanhu, wabva wati “Veduwe-e watsapu akatiroya akazunza negona rose.” Izvi zvinoratidza kusagadzirisika kwezvinhu.
Asi tiripo panyaya yeWhatsApp, panogona kuwanawo vanoti, asika WhatsApp yacho haikuvinge asi kuti iwe ndiwe unoitsvaga.
Handizive kuti pawati, “Ugo noumwe . . .” wanga uchida kuti kudii. Uyewo, chenjerera kungotaura zvinhu zvinoita sekuti ichokwadi, asi chisiri chokwadi kana uchiti, “Rurimi rwedu haruchina ane hanya narwo.”
Ko inga wani Kwayedza iri kumboedza chose kuti vanhu vazive mutauro. Pamwe pacho wati, “Chokwadi internet une chitema
Ndiwe wakonzera vana ujoki.”
Ichokwadi here ichi? Hujoki hauna kugara huriko nechekare internet isati yatombouya here? Usakanganwe kuti iwe sanyanduri une basa rekudzidzisa nyika nechokwadi. Tichiri ipapo, unofanirawo zvakare kuita tsvakurudzo inoita kuti zvaunonyora zvisakanukwe. Semuenzaniso, chiperengo chako chekuti wifiy chingadai chabuda zvakanaka dai wakangoti waifayi kana kuti Wifi sezvainonyorwa muchiRungu macho.
Wazoti: “Vari mabweadzivawee dzosai vana venyu vorasika.
Vorasikawo here makayeva.”
Vari Mamweadziva vanodzosa vana chirudzii ivo vakafa? Hatisisu vapenyu here tine basa rekudzorana kufanana nezvauri kuita nenhetembo kudai? Uye pauri kut vorasikawo here makayeva shandisa chituramubvunzo (question mark).
Panguva inotevera, zama kuita kuti zvauri kuda kutaura zvitaurike nemazwi mashoma. Kana uchinyora nhetembo, zvasiyana nerondedzero saka usatenderere asi kurumidza kuti dyo pane nyaya yako. Watadzazve zviperengo pawati nvimbo (nzvimbo), ndumure (ndumurwa).
Online Reporter