adminnaRegretius Chiroodza
Hewo mwedzi wagara padondemara
Toyeva mudenga wakanyatsotenderera
Mwenje wawo unopenya panyika wafararira
Isu pasi pano toufarira.
Namaziso masvinu panyika wodongorera
Saamai vanorera mhuri
Rwavo runako haruna rondedzero
Kwawakabva hakuna fungidziro.
Sechimumumu wotiyeva.
Chaunofunga isu hatichizive.
Chiso chawo chinorakidza kufara kukuru
Uye njere nendangariro huru.
Rima rousiku wopenzenura
Nyika yedu wovhenekera
Pane njodzi topaona
Munjodzi norufu topona.
Ngoma toridza, dzimbo toimba pajenaguru
Tichitariswa neziso uye mwenje waMambo mukuru
Mashavi totamba, midzimu topira
Tichitungamidza neziso rousiku, jenaguru.
Muchadenga wopumhaira
Somwana okambaira
Zvishoma wopfuura nyenyedzi
Gwara uchiratidza neyawo nhungamiri.
- Regretius Chiroodza ari muGrade 7A paZengeza 8 Primary School, kuChitungwiza.
MAONERO:
Ndine nguva dzandinoti ndikaverenga nhetembo, ndotarisa zera remwana anyora, ndobva ndagutsikana kuti ishasha, ndokunge asina kunyorerwa nemunhu mukuru. Mwana uyu anyora nhetembo yakarongeka, uye inoshandisa mutauro nenzira inoratidza hunyanzvi nekunzwisisa mutauro kwakadzamisisa.
Ndanyanyofarira kujekesa kana kuti kugadzira mifananidzo mupfungwa kwaari kuita nejenaguru kubudikidza netsananguro. Uyewo, nhetembo yake inoita kunge chimbo, zvekuti ndine chokwadi kuti kana ukainzwa ichidetembwa nemuridzi wayo, inoyerera sehuchi.
Rega tipinde munhetembo yacho tinzwe. Izwi rawashandisa rekuti padondemara rinoreva kuzorora kana runyararo, asi ndinoriziva richinzi “dendemaro” kana kuti “kudendemara.” Saka imboritarisa zvakare kuti chiperengo chako nemashevedzerwo arinoitwa ndizvo here.
Asi mundima iyoyi yekutanga, ndimo maita kuti ndikuomberere mawoko nekuti mashandisiro awaita hochekoche, mutinhimira nemabvumira wandikandisa mapfumo pasi. Wazvishandisa nenzira inonyatsoburitsa runako rwemazwi, asi pasina kurasa zvauri kuda kutaura. Iroro ndiro dambudziko rinowanzoitika kana vanhu vakange vachimanikidzira kuti nhetembo iite mabvumira nemutinhimira.
Washandisawo enzansio nenzira yakanaka chose, uchiratidza kuti hausi kungotaura kuti nhetembo yako ingoenda kumberi, asi kuti iburitse zvishamiso zvemwedzi. Wati, “saamai vanorera mhuri,” kwandiri chanyanya kubuda apa rudo, tsitsi nehunyoro. Wazotiwo zvakare, “Sechimumumu wotiyeva,” apa waburitsa kushamisa kunoita mwedzi usina zvawo chaunotaura asi uchitiona mukunyarara ikoko.
Mazwi ako akadzama. Ndikatora semuenzaniso izwi rekuti kupumhaira, rabva mumutsara unoti, “Mudenga wopumhaira.” Kupumhaira kufamba, asi kufamba kunenge kwekungoenda usina kwauri kuziva. Aya mazwi asisashandiswe zvakanyanya nevatauri vechiShona mazuva ano, asi achireva zvakadzama.
Regretius, unogona zvikuru zvekuti ndine chokwadi chekuti kana ukange uchinyora nenzira yakadai, kana paGiredhi 7 ipapo uchaita 1 kuShona. Ramba wakadaro.
Online Reporter