adminnaPrimrose Gwindi
Vanoti vakaiti chwa-chwa
Inobuda rese svisvinwa
Vakaisa ziso pamunhu
Vanoita kunge vakaringa
Chin’u chamafuta
Wakavaringa unoti havasi
Vepasi pezuva pamwe
Vakangoburuka kubva kudenga.
Vachifamba vanoita sekunge
Pasi pari kupisa kunge
Rwaivhi? Vakaripotsera iro
Chiringisa zvose unoti une
Pawakanganisa kupfeka
Vanoita sevasinganwe zvinwiwa
Somunhu wese pasi rino.
Pameso chigagairwa unonyatsoona
Kuti Mwari akatora nguva
Hava shamwari nokuda kwezviito
Uku kutsenga mvura kwaChipo
. Primrose Gwindi ari muForm 2Q paZengeza High 1 School, kuChitungwiza.
MAONERO:
Kutsenga mvura idimikira rinoreva kudada. Pano nyanduri abva aritambanudza kuti zvibva zvanyatsoita sekuti pari kutonyatsotsengwa mvura zvechokwadi. Ndipo paatsanangura mumutsara wekutanga achishandisa nyaudzosingwi kuti, “chwa, chwa.”
Kuratidza kudada kwakapfurikidza, anobva ati kutsenga kwavo mvura kunoburitsa masvisvinwa ese. Nyanduri Primrose Gwindi ishasha yekutsanangura zvinonwisa mvura achitamba nemutauro zvemandorokwati. Ndanakidzwa uye ndikagutsikana paati:
Vakaisa ziso pamunhu
Vanoita kunge vakaringa
Chin’u chamafuta
Apa panobuda kuyemura kwakapfurikidza mwero, kunenge kune ruchiva mukati. Uyewo, kunyiminya kwechinu chemafuta kunoratidza kunyiminya neruchiva rwemaziso evari kuona.
Tichinopinda mundima yechipiri, ndave kunetseka kuti vanhu vari kutaurwa nanyanduri ava ndivanani. Vanhu vari kutaurwa ava, vanomboita sekuti ivo pachavo itsvarakadenga chaidzo nekuti pane panzi:
Wakavaringa unoti havasi
Vepasi pezuva pamwe
Vakangoburuka kubva kudenga.
Asi zviri kunetsa kuti vaverengi vazive kuti vambori anaani ivava vanofamba kunge pasi pari kupisa kunge rwaivhi. Vanhu ava vanenge vanotarisisa vamwe zvakapfurikidza mwero. Nekuti nyanduri ati,
Vakaripotsera iro
Chiringisa zvose unoti une
Pawakanganisa kupfeka
Mundima yekupedzisira ndanga ndichifunga kuti ndichanzwa kuti vanhu ava ndevapi, asi hatiudzwe. Tinongonzwa chete kuti vanoita sevasinganwe zvinwiwa. Asi pasina yambiro, nyanduri anobva asiya kutaura zvevanhu vaye, odzoka pakutaura zvemusikana akanaka.
Zvichida ndiye anga achitariswa nguva yese iyi, hazvinyatsobuda pachena, uye zvinoita kuti nhetembo inetse kunzwisisa. Izvi zvawedzerwa nemitsara miviri yekupedzisira yanzi:
Hava shamwari nokuda kwezviito
Uku kutsenga mvura kwaChipo
Hazvina kujeka kuti Chipo anotsenga mvura nekuda kwerunako here? Ko kutsenga kwake mvura kwabuda papi nekuti ini ndiri kutomuonawo semunhu ari kuchiviwa nevanomutarisa. Chipo ndiye here anofamba achiteta kutsika pasi serwaivhi? Ko wanga uchida kuti “Havana shamwari nokuda kwezviito here?” Ipapa ndipo parasika nhetembo yako. Ndinodawo kuti uchenjerere kushandisa zvimiso nenzira kwayo. Asi pasina izvozvo, uri shangwiti pakuruka mutauro nekutamba nemazwi zvinonwisa mvura. Ramba wakadaro.
Online Reporter