adminTandayi Motsi
SANGANO rakazvimirira rePamberi Trust neMugovera uno richaita dopiro rinopindwa pachena muguta reHarare revaimbi vechidiki apo richapemberera zuva rekukosha kwerurimi rwaamai pasi rose, reInternational Mother Language Day, pamwe nekutunzvaidza bepanhau reKwayedza nebasa guru rariri kuita mukusimudzira mutauro wechiShona.
Zuva iri rinopembererwa musi wa21 Kukadzi gore rega-rega.
Muchinyorwa chakabva kusangano iri, Pamberi Trust Youth Development Projects Officer, Hector Mugani, anoti dopiro iri richange riri panzvimbo yePamberi Trust Gardens panhamba 90 Selous Ave pakati pemigwagwa ya8th and 9th kubva nenguva dza3 masikati kusvika na6 manheru.
Zvikwata zvinenge zviripo zvinosanganisira zvemisambo yeFunky Jazz, Afro-fussion pamwe naTariro neGitare.
“Ipapa tinotarisira kutenda bepanhau reKwayedza mukusimudzira kwaro mutauro weShona,” anodaro Mugani.
Anoti chiitiko ichi chinoenderana nedonzvo ravo rekukurudzira kudyidzana kwevanhu kuburikidza nekusimudzirwa kwetsika nemagariro.
“Zvakakosha kuziva kuti mune simba mukutaura kuburikidza nemurimi rwaamai,” anodaro.
Online Reporter