Online Reporter
Kingstone Mapupu
GORORO range rashaisa mufaro vagari vemupurovhinzi yeMasvingo, Tafadzwa Janyure Zimirenyika (29), akasungwa nekuda kwemhosva 203 dzinosanganisira kupaza dzimba nekuba midziyo yakasiyana, kubata chibharo madzimai pamwe nekuponda.
Inspector Kudakwashe Dhewa vanova mutauriri wemapurisa kuMasvingo vanoti murume uyu akasungwa nguva pfupi yadarika mushure mekunge mapurisa anyeverwa neveruzhinji nekuda kwekupara kwake mhosva.
“Tine murume anonzi Tafadzwa Janyure Zimirenyika (29) akasungwa nemapurisa ekwaNgundu nekuda kwemhosva dzinosanganisa kupaza nekuba, kubata chibharo
nekuponda. Anonzi akapara mhosva idzi kunzvimbo dzakasiyana-siyana kuMasvingo kubva mugore ra2023 kusvika gore rino. Mapurisa achifambira mberi nekufeya, mhosva dzemurume uyu dzasvika 203 pamwe chete. Dzinosanganisira dzekuba, kupamba, kubata chibharo, kuponda, kuba motokari nekuparadza midziyo nedzimwewo dzakasiyana,” vanodaro Insp Dhewa.
Vanoti mhosva idzi dzakaparwa kunzvimbo dzakadai seMwenezi, Ngundu, Renco, Muchakata neZaka.
“Dzinosanganisira yekuponda uko anonzi akaita Jacob Museva uyo akatema nedemo remhando yepiki nemusi wa6 Chikumi gore rino apo mufi uyu akaedza kununura munhu waaida kubira panzvimbo yemabhizimisi yeLundi kuMwenezi,” vanodaro Insp Dhewa.
Musungwa uyu akatopinda mudare kekutanga ndokudzoserwa mutirongo apo mhosva dzakawanda dzaanonzi akapara dziri kuramba dzichinyuka.
“Tinotenda veruzhinji nekuramba vachibatsira mapurisa nemashoko anoita kuti vakwanise kusunga nhubu dzinopara mhosva dzakasiyana. Nekuda kwekuwanda kwemhosva dzekubatwa chibharo kwemadzimai nekuponda, tinokurudzira veruzhinji kuti vamhan’arire vanhu vose vavanoona vachimberereka munharaunda dzavo pasina zvinangwa zvinoonekwa,” vanodaro Insp Dhewa.
