adminMURUME wekubheja mudare kuti haafe akachengeta vana vake asi veshamwarikadzi akanzi abhadhare $150 yemendenenzi pamwedzi.
Philis Jerero akaendesa murume wake, John Jeni, kuHarare Civil Court achida mendenenzi apo aiti ari kuchengeta vana veshamwarikadzi asi vake vachidya nhoko dzezvironda.
“Murume uyu akatiza pamba apo akangobuda achiti ari kuenda kubasa mwedzi mitanhatu yadarika, haana kuzodzoka. Akandisiya nevana ndisina kana pekutangira achinogara neshamwarikadzi ine vana vayo vatatu,” akadaro Jerero.
“Haasi kuchengeta vana vake uye anonyepa kuti ane vana, havasi vake. Ari kuchengeta shamwarikadzi nevana vayo vake vachidya nhoko dzezvironda. Kana kuchikoro havasi kuenda. Ndikamuchaira nhare anoti ndichauya, dzimwe dzenguva anodairisa shamwarikadzi yake yonditukirira,” akadaro Jerero.
Akati aida $300 yemendenenzi pamwe ne$100 yekushaiswa zvemumachira zvichitevera kutiza kwakaita murume wake.
“Haadi kubhadharira vana mari yechikoro, anoti vana vako madofo saka zviri nani kuchengeta veshamwarikadzi,” akadaro Jerero.
Jeni haana kuwirirana nezvainge zvichitaurwa naJerero achiti:
“Iwe handina kana kobiri randinokupa, kanganwa hako kana kumba kwacho handidzoke, ndakatokemba kweshamwarikadzi.” akadaro Jeni.
“Vana ndevako, hauna kana shungu navo kuti vagone chikoro iwe wacho hauna shungu neni. Saka ndakatsvaga ane shungu neni, kushamwarikadzi handibve kune mufaro mutambarakede chaiwo.
“Vana veshamwarikadzi handiregi kuchengeta. Ndinovabhadharira mari yechikoro nekuti vanogona chikoro uyezve vanotonditi baba.” Mutongi Gamuchirai Siwardi akati Jeni abhadhare $150 ypamwedzi.
Online Reporter