Online Reporter
Siphathokuhle Ngulube
Salibonani bafundi. Ngithemba liqhuba kuhle ezifundweni. Imihloliso layo isisondele bafundi kasibuyeleleni umsebenzi wethu ukuze senze ngcono emihlolisweni yethu. Kambe seliqhube njani bafundi kuzichwayisiso zenu?
Selikusigaba bani? Ngithemba seliqhubile sibili ngoba isikhathi sesihambile.
Kusifundo esidlulileyo sikhangele kakhulu isigaba sesibili lesesithathu sagxila kiso. Ngithemba selizwisisa ukuthi kukhangelelwe ukuba lenzeni kuzigaba lezi. Lamuhla sizakhangela isigaba sesine. Lesi yisigaba esilula njalo esimnandi ukusenza ngoba phela usukhetha lokho ofuna ukukwenza ukuveza ukuqiniseka kwesichwayisiso sakho.
Ake sithi isihloko sakho besisithi abantwana abanengi abasakwazi ukuphekwa kokudla kwesintu esigabeni sakini seDombo. Ukhangelile izinto ezinengi ngokudla kwesiNtu wadinga ulwazi olubambekayo njalo ngalokho kudla.
Kusigaba sesine usungakhetha ke ukupheka ukudla kwesiNtu okuthile. Ungakhetha ukupheka umxhanxa. Sekufanele ke ubhale phansi konke ozakusebenzisa ekuphekeni umxhanxa lowo. Ungatsho ukuthi uzafuna imbiza, inkuni, umlilo, amagwadla, ijodo, ingqamu, umganu, inditshi.
Usukubhalile phansi usungatsho ukuthi lokho kudla kuphekwa njani. Ungalandisa ke kusukela ekuqaleni ukuthi lowo mxhanxa uphekwa njani kuze kufike ekutheni usuvuthiwe waphakululwa wadliwa. Ungazithatha imifanekiso usenza konke lokhu. Okunye ongakwenza ngalesi isihloko ungabhala ugwalo oluveza ukuphekwa kokudla kwesintu okutshiyeneyo.
Lapha usungabhala izinto ezingafuneka ukupheka ukudla okutshiyeneyo kwesintu. Ungalandisa ke ukuthi ukudla okutshiyeneyo kungaphekwa njalo ngezindlela ezitshiyeneyo.
Okunjengombhida wendumba. Ungatsho ukuthi ungaphekwa ngokuxhwathiswa ufakwe ulaza. Usungalandisa futhi ukuthi umbhida wendumba ungaphekwa futhi ngokufakwa idobi. Ekulandiseni kwakho ungafaka imifanekiso emihle eyokudla osuxoxe ngakho.
Imifanekiso le izancedisa abafundi ekwazini ukupheka ukudla okutshiyeneyo njengoba phambilini ubutshilo ukuthi abafundi abanengi abasakwazi ukupheka ukudla kwesiNtu okutshiyeneyo.
Lolu gwalo ke soluzakuba yisisombuluko ehlupheni obulubonile phambilini. Ngokwenza njalo uyabe futhi usuncede uzulu wonke hayikhona abafundi bendawo yakini bodwa kodwa ugwalo lolu solungancedisa abantu bonke nje jikelele.
Isigaba sesine ke siya ngokuthi ubhala ngani njalo uhlupho lwakho ngolwani. Okunye ongakusebenzisa kulesi isigaba ligwaliba elikhomba umkhankaso othile. Igwaliba leli selingahamba liqede udubo lolo okhankasa ngalo. Ngithemba siyasizwisisa isigaba sesine.
Sizaqhubeka futhi ngeviki ezayo sikhangele ezinye izihlobo sibone ukuthi kambe singazibamba njani kusigaba sesine. Asisebenzeni nzima bafundi siqede izichwayisiso zethu isikhathi sisesekhona. Asibonaneni ngeviki ezayo.
