Online Reporter
YiNtatheli kaMthunywa
USESENGUNDABAMLONYENI umngcwabo wesigabeni seMangwande, eLower Gwelo lapho okubikwa izakhamizi lezihlobo zichitheke ngesikhathi sekuzakwehliswa ibhokisi, elinye ilunga lomdeni selisidla amahabula liphethe ifotsholo.
Kuvidiyo ebhoda kunkundla zokuxhumana kuvela enye indoda ogama layo ngu-Edwin Moyo iphethe ifotsholo ihlasela abantu emngcwabeni kamalumayo okuyikho okubangele ukuthi abantu bachitheke umngcwabo ungakapheli.
Kubikwa omakhelwane kunye lezihlobo babuye bahlangana behlisa ibhokisi elaseliqede ingxenye yosuku liphezulu kwegodi nanko uMoyo ubelokhe elinde ingcwaba likamalumakhe ephethe ifotsholo.
Isehlakalo lesi senzakale esiqintini seNjobela ngaphansi kwenduna uChisadza, eMangwande, eLower Gwelo.
Amapholisa eMaboleni aqinisekise ukuba asachwayisisa ngodaba lolu kunye lokuthi uMoyo osebenzisa izidakamizwa lokhu engakabotshwa.
UMnumzana Job Njobela Moyo, ongumlisa endaweni le, uqinisekise ngesehlakalo lesi esitshiye isigaba sonke siphethe imikhono ekhanda.
Kubikwa indaba le yabikelwa amapholisa kunye lenduna uChisadza nanko abanye abantu balimala ngesikhathi behlaselwa nguMoyo.
“Lokhu ngathwetshulwa yingwe kangikaze ngihlangane lesehlakalo esinje, lapho umngcwabo omiswa khona ibhokisi selisehliswa egodini.
“Lami nginje ngabaleka ngoba umfana wakhona ubesevuke upenyane, ehlasela wonke umuntu, ngitsho labafundisi akade bephethe umngcwabo,” utshonjalo.
Umlisa uNjobela uthe uMoyo wacunulwa yisinqumo semuli sokuba umngcwabo uqhubeke loba kwakuke kwathiwa umiswe kuze kucace ukuba ufe njani.
“Umuyi uMilton Mpala wabulawa njalo kukhanya angathi imuli yayivumelane ukuthi indaba le iqale ilungiswe andubana abekwe, ngokunjalo kwakulokungazwisisani esililweni lesi kusiya emngcwabeni,” kutsho uMlisa unjobela.
Uthe uMoyo waziphosela phakathi kwegodi efuna ukungcwatshwa lomalumakhe uMpala kodwa wasephuma egodini waqala ukulwa.
“Wayekhanya edakiwe ngesikhathi eqala ukutshaya abantu andubana adobhe ifotsholo aqale ukuhlasela abantu ngalo engakhethi.
“Kwaba yisiphithiphithi ngaze ngalaya abantu ukuthi babaleke,” utsho njalo.
Uthe ubize imuli le ukuthi ifike enkundleni ngeSonto ngecala lokwehluleka ukuqondisa isihlobo sabo okubangele ukuthi abantu bachitheke umngcwabo ungakapheli.
Esinye isihlobo esingathandanga ukuqanjwa ngebizo siveze ukuba umlisa ubaphathe ngesandla esilukhuni kukanti bona basakhalela isihlobo sabo esife ngokubulawa.
“Umfana lo uyaziwa esigabeni ngokusebenzisa izidakamizwa, kangikwazi ukuthi kungani umlisa ekhethe ukuthi asidonsele enkundleni ikakhulu ngesikhathi sisazilile futhi sikhathazekile ngesehlakalo lesi.
“UEdwin nguye okumele adingwe abotshwe ngamapholisa ngoba lathi njengemuli siyayisola indlela aziphatha ngayo, lathi kusihlukuluzile,” kutsho ilunga lemuli le.
