Online Reporter
Fungai Muderere
IQEMBU leHwange liqhubeka litshengisa ukuthi lifuna ukubuyela kuCastle Lager Premier Soccer League ngemva kokuqeda isigaba sokuqala sePacific Breeze Southern Region Soccer League lihlezi phezulu kwelogu.
Izimbamgodi zamalahle seziqoqe imiklomelo engu-41 emidlalweni engu-17, zinqobe engu-12 njalo zadlala ngokulingana kwemihlanu.
Okwenza bakhokhele kanje yikuthi kabakaze banqotshwe njalo sebengenelwe ngamabhola amane kuphela kulisizini.
ITalen Vision isendaweni yesibili ilemiklomelo engu-37, layo ingakaze inqotshwe, okutshiya impi yesicoco isavulekile.
IJordan FC ilandela endaweni yesithathu ilemiklomelo engu-33, kuthi iNkayi United ibe ngeyesine ile-30, iBulawayo Warriors ihlezi kunombolo yesihlanu ile-29.
Umgcinisihlalo weZifa Southern Region, u-Cris Mtungwazi, uthe uyathokoza ngendlela isizini ehamba ngayo.
“Iligi ihambe kuhle kakhulu njalo amaqembu ancintisana ngamandla. Umhlangano wethu wokuhlola phakathi kwesizini uphumelele kakhulu, amaqembu aphakamise imibono emihle njalo sikhangelele isigaba sesibili sesizini ngokuzethemba,” kutsho uMtungwazi.
Ngaphansi kwetafula, i-Aqua Stars yiyo ehlezi ekucineni ilemiklomelo engu-11, ilandelwa yiMosi Rovers, Bosso90, Imbizo FC leNjube Spurs, wonke elwisana lokubalekela ukwehla.
Empini yabahlohla amabola amanengi, umgadli weHwange u-Justine Kaunda ukhokhele ngamabola angu-12.
Umlingani wakhe u-Moresteff Ncube usele-10, kuthi u-Marshall Murambiwa weBulawayo Warriors usehlohle ayisifica munwe munye.
Abanye abasemncintiswaneni wokuba nguBandile Moyo weNjube Spurs loGabriel Rugoho weTalen Vision, asebehlohle ayisikhombisa ngamunye.
Sekusele imidlalo engu-17 ukuthi isizini iphele, okutsho ukuthi impi yesicoco, eyokukhwela kuPremier Soccer League leyokubalekela ukwehla isazatshisa.
