admin
Cornelius Luphahla
KUYABE kungabizwa ozwayo njalo kuguga othandayo ngoMgqibelo kuyonale iviki eHartsfield Stadium edolobheni lakoBulawayo lapho okuzabe kulomculi we-reggae uWinky D ejabulisa uzulu ngengoma zakhe ezigijimisa igazi.
Akulalwa mhlalokho ngoba umhlabeleli lo ezatshaya kuze kuse.
UMthunywa uxhumane loMqondisi womhlabeleli lo uMwalimo Banda wachaza ukuthi iqembu leli laqala ngo2004.
“Iqembu leli laqala ukucula ngo2004 lapho elalisacula lilamantombazana lamajaha. Khathesi lilamalunga angu-8 angamajaha kuphela. Noma kunjalo nxa esecula ngeke utsho ukuthi ngamajaha wodwa ngoba wonke amaphimbo balawo,” kutsho uMwalimo.
Uqhubekele phambili njalo wathi okwenza bavakatshele koBulawayo yikuthi bafuna ukuzojabulisa uMthwakazi njalo bafuna ukugcwalisa umculo wabo ebantwini.
“Okwenza sizovakatshela koBulawayo yikuthi sifuna ukuzojabulisa abantu besikhangele ngamehlo hatshi ukuthi basizwele emsakazweni. Ngiyazi ukuthi abantu abanengi abamazi uWinky D yikho sibone kungcono ukuba sivakatshele koBulawayo ukuze labangamaziyo babemazi,” kutsho uMwalimo.
“Okunye njalo sifuna ukuthi wonke umuntu abelawo umculo wethu ngoba ngikhuluma nje balutshwane abawutholayo noma nje bekhona abawuthengisa ngokungekho emthethweni. Sifuna njalo ukukhuthaza abalandeli bethu ukuba bengabothenga umculo othengiswa emigwaqweni ngoba yikho okubulala umculo wethu.
“Okwenze sakhetha ukucula ubusuku bonke yikuthi sinanzelele ukuba abantu bayabe bengasebenzi ebusuku njalo kuyabe kuyimpelaviki abantu beziphumulela. Sasithi nxa sibe lomcimbi wethu phakathi kweviki abanye abantu basole bathi bona bayabe besemsebenzini kumbe bevukela emsebenzini yikho khathesi sithe siwenze wonke umuntu ekhona engasebenzi,” kuphetha uMwalimo.
Online Reporter